Anulimi i Lotarisë Amerikane, sa rrezikojnë aplikuesit

Projektligji për ndryshimin ishte planifikuar që në shkurt

Lotaria Amerikane ishte në program për t’u ndërprerë që në fillim të këtij viti, pas një propozimi të konservatorëve në Kongres.

Shtëpia e Bardhë ka njoftuar se propozimi për t’i dhënë fund programit të Lotarisë së Diversitetit ishte përfshirë në parimet e reformës së imigracionit që Shtëpia e Bardhë ka dorëzuar në Kongres, dhe është pjesë e projektligjin RAISE, që Presidenti e ka mbështetur. Sipas “Zërit të Amerikës”, pas interesimit në Shtëpinë e Bardhë mbi shqetësimet e ngjallura në vendet ku ky program është popullor, përfshirë Shqipërinë, u mësua se ndërprerja e lotarisë nuk është aspak lajm i ri. Në fakt, projektligji është paraqitur në Senatin Amerikan në shkurt të këtij viti, dhe në të thuhet se “projektligji e ndryshon Ligjin për Imigracionin dhe Shtetësinë, duke e eliminuar kategorinë e vizave të diversitetit”. Projektligji ndodhet në Komisionin e Ligjeve të Senatit, në pritje për t’u diskutuar. Procesi është i tillë, që kur të bëhet diskutimi, anëtarët propozojnë ndryshimet e tyre dhe votojnë nëse t’i përfshijnë ose jo këto ndryshime në variantin përfun- dimtar. Në Dhomën e Përfaqësuesve nuk po diskutohet ende, megjithëse një variant i ngjashëm i quajtur “Projektligji për imigracionin në interesin kombëtar” është paraqitur në muajin shtator. Të dyja variantet janë sponsorizuar nga ligjvënës republikanë. Por sa është i justifikuar shqetësimi se ky program vë në rrezik sigurinë kombëtare? Këndvështrimet janë të ndryshme. Autori i sulmit në Nju Jork, Saifullo Saipov, nga Uzbekistani, është i pesti përfitues nga programi i diversitetit, që rezulton i përfshirë në akte terroriste në Shtetet e Bashkuara, sipas Qendrës për Studimet e Imigracionit, e cila në fakt është një organizatë që favorizon emigracion të ulët. Presidenti Trump tha se preferon një program të mbështetur te meritat, që ai beson se do të ishte më i favorshëm për sigurinë dhe ekonominë e Shteteve të Bashkuara. “Duam ta eliminojmë imigrimin zinxhir. Ky person hyri dhe solli me vete njerëz të tjerë. Dhe ai ishte pikë kontakti, sipas informacioneve paraprake, për 23 persona të tjerë që erdhën dhe kjo është e papranueshme”, tha ai. Në më pak se tre vjet janë mbajtur tri seanca dëgjimore lidhur me ekspozimin ndaj rreziqeve të sigurisë kombëtare nga ky program. Në vitin 2013, inspektori i përgjithshëm i Departamentit të Shtetit dëshmoi se programi paraqet rreziqe për sigurinë kombëtare nga zyrtarë armiqësorë të zbulimit, kriminelë, dhe terroristë që mund të përpiqen ta përdorin programin për të hyrë në Shtetet e Bashkuara, si banorë të përhershëm.

Por demokratët thonë se programi i shërben diversitetit të vendit. Guvernatori i Nju Jorkut, Andrew Cuomo, e akuzoi presidentin se po e politizonte sulmin në Manhatan. “Mesazhet e presidentit në ‘ Twitter’ nuk ndihmojnë. Nuk besoj se ishin të mbështetura në fakte. Mendoj se kishin tendencën që të gjenin fajtorë dhe të politizojnë situatën”. Analistët e antiterrorizmit janë gjithashtu skeptikë se eliminimi i programit mund ta përmirësonte sigurinë në Shtetet e Bashkuara. “Ne nuk po përballemi vetëm me problemin e terrorizmit ndërkombëtar nga njerëz që vijnë këtu nga vendet e huaja. Ky nuk është problem aq i madh sa ekstremizmi i të radikalizuarve brenda vendit, ku persona që kanë lindur dhe janë rritur në Shtetet e Bashkuara hyjnë në rrugën e ekstremizmit të dhunshëm”, tha Bennet Clifford, një studiues i terrorizmit në Universitetin “George Washington”. Programi filloi në vitet 1990, kur senatori Charles E. Schumer e propozoi atë. Por në vitin 2013, ai ishte pjesë e një grupi dypartiak për t’i dhënë fund programit, në favor të një sistemi meritash, i cili dështoi pasi Dhoma e Përfaqësuesve nuk votoi fare për të. ( Marrë nga “Zëri i Amerikës”)