Rama i sulmoi, Meta: Solidaritet me gazetarët
“Sidomos për gazetarët e terrenit, që shpesh rrezikojnë”
Kreu i shtetit, Ilir Meta, priti në Presidencë gazetarë, redaktorë dhe kryeredaktorë të mediave dhe portaleve shqiptare në Ditën Ndërkombëtare kundër dhunës ndaj gazetarëve.
Në fjalën e mbajtur përpara të pranishmëve, Meta shprehu solidaritetin e tij për gazetarët, duke vlerësuar rëndësinë e misionit të tyre jetik dhe vendimtar në pasqyrimin e saktë e të paanshëm të lajmeve dhe ngjarjeve më aktuale të realitetit të përditshëm shqiptar. Vlerësimi i punës së gazetarëve nga kreu i shtetit, Ilir Meta, vjen në një kohë kur Kryeministri Rama ka fyer gazetarët e terrenit në daljet e tij publike. Një javë më parë, në Parlament, Kryeministri u kërkoi gazetarëve të lexojnë më shumë, të njohin ngjarjet për të cilat raportojnë dhe të mos jenë “kazanë”. Ndërsa një ditë më parë, Presidenti Meta u kujtoi gazetarëve se dera e Presidencës për përfaqësuesit e medias do të jetë e hapur. “Dëshiroj të shpreh respektin dhe mirënjohjen për misionin tuaj si misionarë të fjalës së lirë dhe të vetë lirisë mbi të cilën është ndërtuar e gjithë shoqëria jonë demokratike, dhe pa garantimin e së cilës ajo nuk mund të funksionojë më mirë dhe sipas standardeve europiane. Me këtë rast dua të shpreh solidaritetin më të fortë dhe më të sinqertë me të gjithë gazetarët në vendin tonë, në shërbim të misionit të tyre, që ka një rëndësi vendimtare dhe kyçe dhe për të ardhmen e mëtejshme të ven- dit. Ashtu sikurse ka qenë vendimtar dhe jetik i gjithë ai progres që vendi ka realizuar në këto 27 vite. Gjithmonë do të jem këtu gjatë këtyre pesë viteve në mbështetjen e misionit tuaj, të të gjithë gazetarëve. Një solidaritet të veçantë do të doja të shprehja sidomos për gazetarët e terrenit, për ata që raportojnë ngjarjet, faktet, në mënyrë të menjëhershme, shpesh edhe duke sakrifikuar në çdo kohë, shpesh dhe duke rrezikuar për shkak të ngjarjeve dhe karakterit të ndryshëm të tyre, gjithmonë në shërbim të lirisë, në shërbim të qytetarëve dhe në interes të konsolidimit të të gjithë sistemit tonë demokratik”, tha Meta.