Operacioni "Vjeshtë 2017", u bllokuan 41 mln euro pasuri
Bilanci i dy muajve, nga makinat luksoze, anijet e pallatet
Makina, troje, apartamente, mjete lundruese, llogari bankare e biznese me vlerë rreth 41 milionë euro janë sekuestruar përgjatë dy muajve nga Policia e Shtetit, gjatë operacionit "Vjeshtë 2017".
Nga data 28 gusht, kur nisi operacioni, në zbatim të porosisë së Kryeministrit Edi Rama, e deri më 31 tetor, Policia ka referuar në Prokurori rreth 80 procedime pasurore. Thuajse të gjitha këto procedime janë referuar në Prokurorinë e Krimeve të Rënda, me përjashtim të disa rasteve të veçanta që po hetohen nga prokuroritë e rretheve gjyqësore. Sipas statistikave zyrtare të Policisë së Shtetit, deri tani janë bllokuar 102 banesa ( shtëpi private, vila, apartamente); 1 pallat 11- katësh; 111 automjete luksoze, nga të cilat 12 të blinduara; 120 biznese, njësi tregtare dhe objekte shërbimi; 120 mijë metra katrorë tokë; 3 mjete lundruese, anije, gomone. Aksioni do të vazhdojë pa ndonjë afat të përcaktuar, në zbatim të planit operacional "Vjeshtë 2017".
OPERACIONI Drejtori i Përgjithshëm i Policisë, Haki Çako, në fillim të muajit shtator zhvilloi një takim me gjithë drejtuesit e Policisë, të cilëve u përcolli porositë e Kryeministrit për goditjen e të gjithë atyre që bëjnë rolin e "të fortit", duke lëvizur me makina të blinduara e luksoze. Gjithashtu kërkoi sekuestrimin e aseteve që ata kanë krijuar, si rezultat i veprimtarisë kriminale, si pasuri të paluajtshme, ndërtesa, toka, makina, hotele, motele, lokale, investime të ndryshme në shoqëri biznesi, etj. Plani operacional "Vjeshtë 2017" nisi pasi ishin bërë disa hetime paraprake nga ana e strukturave të Policisë në bashkëpunim edhe me Prokurorinë.
MAKINAT Gjatë dy muajve, Policia e Shtetit pati bllokuar për verifikim 180 automjete luksoze, pasi kishte informacione se mund të ishin ose të trafikuara, ose të përfituara me të ardhura nga krimi. Pasi u krye verifikimi i këtyre au- tomjeteve, kaluan nën sekuestro 111 prej tyre, ndërsa pjesa tjetër u zhbllokuan pasi rezultuan të rregullta. Vlera e këtyre mjeteve arrin deri në 6 milionë euro. Ndërsa mes tyre janë edhe 12 makina të blinduara, nga 16 që ishin bllokuar fillimisht, por 4 rezultuan me dokumentacion të rregullt.