Akademia e Shkencave kërkon “paqe” me Ramën, bashkohen dhe kritikët
Në datën 16 nëntor paraqiten projektreformat, mund të jenë disa alternativa që do të prezantohen
Asambleja e Akademisë së Shkencave i bën ftesë për dialog Kryeministrit dhe i bën një kërkesë Presidentit të Republikës të përgjigjet për dekretimin e kryetarit të ri të ASH- së.
Pas deklaratave të forta të Kryeministrit Edi Rama për heqjen e fondeve për Akademinë e Shkencave dhe një ngërçi të shpallur botërisht që me zgjedhjen e drejtuesve të ASHsë, asambleja e këtij institucioni është mbledhur me urgjencë për të vendosur për hapat që do të hedhë për normalizimin e situatës. Pas mbledhjes së dy ditëve më parë, dje akademikët dolën përpara medieve me një deklaratë të përbashkët ku bënin me dije masat e menjëhershme që janë marrë e do të merren në ditët në vijim. Një ndër to, edhe “vendosja e paqes” me Kryeministrin Edi Rama.
“Në vijim të dialogut me Kryeministrin e Shqipërisë, z. Edi Rama, asambleja i është drejtuar dje me një ftesë zyrtare për takim për zhvillimin e një debati konstruktiv në këtë fazë përmbyllëse të reformës, si një fazë ‘ bashkëqeverisjeje me shkencëtarët’. Akademia ka shprehur dhe dhënë në vijimësi disavjeçare angazhimin e plotë dhe ekspertizën për kryerjen e reformës institucionale të kërkimit shkencor në vend dhe si pjesë e saj edhe për reformimin e Akademisë së Shkencave, u shpreh sekretari shkencor i ASH- së, Vasil Tole. Ndërsa në deklaratën e lexuar nga juristja, ak. Aurela Anastasi, shprehej qartë se: “Në vijim të procesit për integrimin e vendeve të Ballkanit Perëndimor, jemi të angazhuar për të marrë pjesë aktive në dialogun shkencë- politikë, por kërkojmë që dialogu të mbështetet në Kushtetutë, në parimin e shkencës të së drejtës, lirisë së kërkimit shkencor, në pavarësinë institucionale edhe në kodin e etikës”. Me gjasë duke iu referuar deklaratave të Kryeministrit Rama, i cili disa ditë më parë e quajti Akademinë e Shkencave një “nëndetëse të mbetur që nga koha e sovje- tikëve”, Anastasi citoi se “Asambleja e Akademisë së Shkencave, duke iu shmangur debatit emocional, në komunikimin me epitete dhe metafora, njeh vetëm forcën e argumentit shkencor, logjikës edhe fakteve. ASH ka dhënë një kontribut të rëndësishëm me ndikim të konsiderueshëm në kërkimin shkencor dhe në zhvillimin e vendit, megjithatë asambleja e ASH- së e njeh të nevojshme rritjen e kapaciteteve të saj, në drejtim të rolit që duhet të luajë ajo në kërkimin shkencor, në politikëbërjen për zhvillimin e shkencës, si dhe të politikave të zhvillimit të vendit mbështetur në arritjet bashkëkohore shkencore”.
REFORMIMI Ndryshe nga herët e tjera, kur akademikët janë shprehur me tone të nxehta kundrejt njëri- tjetrit, dje dukej se gjakrat mes tyre janë qetuar. Edhe vetë akademik Artan Fuga, një nga kritikët më të mëdhenj brenda Akademisë së Shkencave, binte në një mendje me kolegët e tjerë akademikë për zgjidhjen e ngërçit të krijuar, reformimin e institucionit dhe, pa dyshim parandalimin e vënies në jetë të deklaratës së Kryeministrit për heqjen e buxhetit të Ak- ademisë së Shkencave. E megjithatë, Fuga deklaroi se në lidhje me reformimin e ASHsë mendimet janë të ndryshme dhe fakti që pranohet mendimi ndryshe, për të është një arritje e madhe. Se çfarë do të vendoset në lidhje me reformën, pritet të mësohet në datën 16 nëntor. “Pranë Akademisë së Shkencave është ngritur Komisioni ad hoc i reformës, i përbërë nga akademikë nga e gjithë hapësira mbarëkombëtare shqiptare, me përfaqësues të shquar të Asamblesë sonë, Akademisë së Shkencave dhe të Arteve të Kosovës, të Maqedonisë, të botës akademike arbëreshe dhe diasporës shqiptare, të cilët brenda një afati 2- javor do të përgatisin propozimin tonë kolegjial për reformën institucionale të kërkimit shkencor dhe vendin e Akademisë së Shkencave në të”. Por, me sa duket, nuk do të ketë vetëm një projekt. “Asambleja vendosi që më datë 16 do të jetë përgjigjja për reformimin. Nuk do të jetë një opsion, por do të jenë të gjitha opsionet e mundshme, duke argumentuar se cilat janë anët pozitive, negative edhe se sa kushtojnë. Çdo gjë do të argumentohet”, tha akademik Apollon Baçe.