Akademia letër Presidentit për dekretimin, Cici ndjek mbledhjen

Akademia e Shkencave i ka dërguar një kërkesë Presidentit të Republikës, Ilir Meta në lidhje me dekretimin e kryetarit të ASH- së. “Asambleja vendosi që të sqarohet çështja e mbetur pezull në lidhje me emërimin nga institucioni i Presidentit të kryetarit të zgjedhur të saj. Për këtë i është drejtuar së fundmi një kërkesë konform legjislacionit në fuqi për informimin për t’u shprehur në lidhje me këtë praktikë”, u shpreh sekretari i përgjithshëm Vasil Tole. Siç do të shprehej ak. Aurela Anastasi, ende nuk ka ardhur një përgjigje nga ana e Presidentit, e megjithatë, në mbledhjen e djeshme të ASH- së ishte i pranishëm edhe shefi i kabinetit të Presidentit të Republikës, Arben Cici, i cili ndoqi nga afër zhvillimet më të fundit në ASH. “Në lidhje me dekretimin që duhet të bëjë Presidenti i Republikës për kryetarin e Akademisë së Shkencave, nuk ka një përgjigje. Kryetari është zgjedhur më 4 shtator, ndërsa Asambleja në takimin e 31 tetorit i kërkon Presidenti një përgjigje në bazë të kësaj. Presidenti i Republikës, në bazë të Kushtetutës, duhet që të dekretojë me qëllim që të legjitimohet dhe kushtetohet zgjedhja e asamblesë së Akademisë së Shkencave. Nëse nuk dekretohet, do të thotë që ajo mbetet nul. Natyrisht që nuk është i detyruar që të dekretojë, por ne mendojmë se duhet që të na japë disa arsye, në qoftë se vendos të mos e dekretojë në krye të asamblesë kryetarin e Akademisë së Shkencave”, tha Anastasi. Duke shtuar se “Kushtetuta nuk ka një afat për këto lloj dekretesh, por ne mbështetemi vetëm në afate të arsyeshme”. Ky hezitim i Presidentit duket se ka vënë në mendime edhe vetë akademikët, të cilët po mendojnë të ndryshojnë statutin e ASH- së në lidhje me zgjedhjen e kryesisë. Sipas Toles, mundet që përmes statutit “të mos pranojmë më zgjedhje për kryetar të akademisë pa kandidatura alternative”.