Djukiç: Shqiptarët i kemi miq, ndeshjen e fituam me një episod
Krahas punës për të marrë fitoren në këtë ndeshje, trajneri i Partizanit të Beogradit ka qenë një nga njerëzit që ka bërë më së shumti thirrje që serbët t'u kthenin mikpritjen shqiptarëve për atë që ndodhi në Elbasan dy javë më parë. Në deklaratën e dhënë për "SuperSport" në përfundim të sfidës, Djukiç ka bërë me dije se ndeshja ishte e vështirë dhe se gjithçka u zgjidh nga një goditje mjeshtërore e Tosiçit. Ai ka theksuar faktin se shqiptarët nuk i sheh aspak si armiq, por si miq. Në analizën e përballjes me korçarët, Miroslav Djukiç ka nënvizuar cilësitë e skuadrës shqiptare dhe ka bërë me dije se secila skuadër që do të luajë në vazhdim ndaj saj, do ta ketë të vështirë.
Goli - "Dihej që ndeshjen mund ta vendoste një detaj i vogël, siç ishte goditja e Tosiçit në pjesën e parë. Na u dha mundësia që të luanim disi më të tërhequr, meqë krijuam avantazhin. Dihej që Skënderbeu ishte kundërshtar i vështirë dhe çdo ekip tjetër do ta ketë të vështirë përballë tyre. Gjithsesi, ne e morëm trepikëshin që deshëm në ndeshjen direkte me këtë skuadër".
Pritja - "Jam shumë i kënaqur edhe për trepikëshin, por do të isha edhe më i kënaqur nëse Skënderbeu do të kthehej në Shqipëri me mbresa të bukura nga kjo ndeshje. Ne i konsiderojmë miq shqiptarët dhe jo si armiq".
Strategjia - "Shënimi i golit vendosi ndeshjen. E dinim që në fillim që do të ishte sfidë shumë e fortë dhe shumë e vështirë, por në fund ishim ne që ia dolëm".