Prezantohet “Forca e Ligjit”, si goditet krimi i organizuar
Dy ekspertë të FBI, një gjerman e dy italianë, asistojnë në hetime
Në Ministrinë e Brendshme u prezantua dje operacioni “Forca e Ligjit”, që parashikohet të zbulojë lidhjet e botës së krimit me përfaqësuesit e jetës politike dhe zyrtarë të lartë.
Dokumenti strategjik i miratuar të hënën nga Këshilli i Ministrave, u hartua nga ekspertë të Ministrisë së Brendshme, të cilët parashikojnë se rezultatet e para të këtij planveprimi do të jenë të dukshme në vitin 2018. Ndërsa paraprakisht janë identifikuar një serë grupesh kriminale. Zv. ministri i Brendshëm, Besfort Lamallari, që prezantoi dje planin operacional, u shpreh se në këtë betejë do të kenë në krah edhe disa prej ekspertëve të huaj më të mirë në këtë fushë. Një mbështetje e vazhdueshme e specializuar do të ofrohet nga agjenti special i FBI- së, Mark Newhouse, i cili ka një përvojë të spikatur në drejtim të hetimit të krimit të organizuar dhe pastrimit të parave. I pranishëm përkohësisht do të jetë edhe drejtuesi i FBI për Europën Juglindore, Jack Liao. “Forca e Ligjit” do të kenë edhe mbështetjen e Hubertus Hoffmann, ekspert i Zyrës Federale të Policisë Kriminale të Gjermanisë, me një përvojë të konsoliduar ndërkombëtare në luftën kundër krimit të organizuar dhe trafikut të drogave. Së shpejti do të mbërrijë dhe qëndrojë për një kohë të gjatë koordinatorja e Drejtorisë Kundër Krimit të Organizuar dhe Krimeve të Rënda në Ballkanin Perëndimor, në Ministrinë e Brendshme britanike, Sarah McAveety. Gjithashtu, skuadrës do t’i bashkohen edhe dy ekspertë të posaçëm të Guardia di Finanza e Interforza. Taskforca qendrore përbëhet nga përfaqësues të disa institucioneve, përfshin Ministrinë e Brendshme, Ministrinë e Drejtësisë, Ministrinë e Financave, Shërbimin Informativ Shtetëror, Prokurorinë, Policinë e Shtetit dhe Shërbimin e Çështjeve të Brendshme dhe Ankesave. Misioni i kësaj task- force është drejtimi, koordinimi, lehtësimi dhe monitorimi i zbatimit të objektivave të këtij planiveprimi. Taskforca kryesohet nga ministri i Brendshëm. GRUPET KRIMINALE Platforma e prezantuar dje në Ministrinë e Brendshme përmbante edhe dy shembuj konkretë se si do të goditet krimi i organizuar në operacionin “Forca e Ligjit”. Në skemën e parë përshkruheshin veprimet hetimore për kronologjinë e ngjarjeve që lidhem me një grup kriminal. Në krye të këtij grupi ndodhet një person, me urdhër të të cilit janë kryer disa krime të rënda për një periudhë 12vjeçare. Gjatë gjithë kësaj kohe, Policia e ka pasur vazhdimisht të dyshuar këtë person, por pa arritur të provojë në asnjë rast përfshirjen e tij në këto krime. Në skemë përmendet vrasja e parë e urdhëruar prej tij, vrasje e kryer me pagesë, e cila shkon drejt zbulimit me arrestimin e një të dyshuari. Por ky i dyshuar, që ishte vënë në pranga në bazë të një deklarimi, lirohet nga Gjykata pasi dëshmitari heq dorë nga dëshmia e parë. Më pas seria e vrasjeve vazhdon, deri sa hyjnë në lojë edhe dy grupe kriminale dhe atentatet zhvendosen edhe jashtë kufijve. Kundërshtarët nisin të eliminojnë njëri- tjetrin, në atentate në makina, lokale e hotele. KRIMI DHE POLITIKA
Në skemën e dytë që përmban platforma e planit operacional, përshkruhet lidhja e politikës me grupet kriminale, që përdoren kryesisht gjatë fushatave elektorale. Hetimet në këtë rast nisin që nga politikani apo biznesmeni që është kandidat për t’u zgjedhur. Verifikohet fillimisht pasuria e tij, që në rastin e përdorur në skemë, është një biznes i licencuar, por me një bilanc negativ. Më pas Policia nis një verifikim për burimin e parave që përdoren për fushatë, personat e përfshirë dhe mjetet që ka në dispozicion. Në sitën e Policisë kalojnë makinat që përdoren nga personat e përfshirë në fushatë, apo edhe transaksionet me vlera të mëdha që kryhen gjatë kësaj periudhe. Verifikohen udhëtimet që mund të kryejnë së bashku, me të njëjtën linjë dhe të njëjtën datë bashkëpronari i kandidatit për t’u zgjedhur me të punësuarit prej tij. Zbulohen takimet që ata kanë pasur me persona që dyshohet të jenë pjesë e një grupi kriminal, veprimtaria e të cilit shtrihet kryesisht në fushën e narkotikëve.