Prokuroria: Ligji s'lejon lirimin me kusht për veprën penale të Tafilit
Prokuroria e Krujës do ta apelojë vendimin e dhënë nga Gjykata e Krujës. Kjo e fundit vendosi lirinë me kusht të Genc Tafilit, ndonëse Prokuroria ka argumentuar se nuk mund të jepet "lirimi me kusht", për një të dënuar, i cili akuzohet për veprën penale të Tafilit. Sipas Prokurorisë, vendimi i dhënë nga gjyqtarja e kësaj çështjeje është në kundërshtim flagrant me ligjin. "Gjyqtarja Enkeleda Hoxha ka pranuar kërkesën e të dënuarit Genci Tafili, i cili vuante dënimin në IEVP Fushë- Krujë për lirim para kohe me kusht dhe ka urdhëruar lirimin e tij të menjëhershëm nga vendi i vuajtjes së dënimit, duke e urdhëruar atë që të mbajë kontakte me Zyrën e Shërbimit të Provës Krujë.
Prokuroria e Krujës vlerëson se vendimi i Gjykatës së Rrethit Gjyqësor Krujë është marrë në kundërshtim të hapur me ligjin dhe se përbën shkak që nëse çmohet si i tillë, të informohet Këshilli i Lartë i Drejtësisë për të verifikuar veprimtarinë në kundërshtim me ligjin të gjyqtares për këtë rast. I dënuari Genci Tafili, që është liruar me kusht, ka qenë duke vuajtur dënimin për veprën penale "Vrasja në rrethana të tjera cilësuese", parashikuar nga neni 79/ c të K. Penal, konkretisht bëhet fjalë për vrasjen e drejtorit të Policisë së Shkodrës, Arben Zylyftari, dhe i kishin mbetur për të vuajtur më shume se tri vite burgim.
Megjithëse ai rezulton të jetë një person me rrezikshmëri të lartë, as kjo rrethanë dhe as rrethanat e tjera të parashikuara në ligj, nuk janë marrë në konsiderate nga gjyqtarja në fjalë", thuhej në reagimin e Prokurorisë së Krujës. Akuza argumenton më tej, se në nenin 64 të K. Penal, "Lirimi me kusht", parashikon shprehimisht se, "nuk lejohet lirimi me kusht për të dënuarin përsëritës për krime të kryera me dashje si dhe për të dënuarit për kryerjen e veprave penale të parashikuara nga nenet 78/ a, 79/ a, 79/ b, 79/ c apo paragrafi i tretë i nenit 100 të K. Penal". "Në rastin konkret, megjithëse dispozita ndaluese për nenin 79/ c është një dispozitë urdhëruese dhe për këtë shkak prokurori në seancë ka kërkuar që të rrëzohej kërkesa e të dënuarit, në mënyrë flagrante, Gjykata e ka injoruar këtë pengese ligjore dhe në shkelje të plotë të ligjit, ka urdhëruar lirimin e tij. Vendimi i Gjykatës është ankimuar nga Prokuroria e Rrethit Gjyqësor Krujë që të nesërmen e dhënies së tij dhe ne do të vazhdojmë të ndjekim në vazhdimësi ecurinë e procesit", thuhej më tej në reagimin e Prokurorisë së Krujës.