Puidgemont separatistëve: Bashkë, kundër represionit
Sondazhi, grupet pro pavarësisë mund të fitojnë zgjedhjet
Udhëheqësi katalanas, Carles Puigdemont ka kritikuar ashpër Bashkimin Evropian ‘ për mbështetjen e grushtit të shtetit të Spanjës kundër Katalonjës’.
Rreth 200 kryebashkiakë nga rajoni kanë shkuar në Bruksel për ta mbështetur atë. Ishpresidenti i Katalonjës iu drejtua autoriteteve europiane duke iu thënë: “A do ta pranoni rezultatin e referendumit katalanas apo do të vazhdoni të ndihmoni Rajoy për grushtshtetin e tij?”. Qeveria e Puigdemont shpalli pavarësinë nga Spanja muajin e kaluar. Kjo nxiti autoritetet në Madrid që të aktivizojnë nenin 155 të Kushtetutës së tyre, i cili në rast të mosrespektimit të Kushtetutës ( siç u quajt referendumi në Katalonjë dhe shpallja e pavarësisë), të kenë të drejtën të ndërhyjnë edhe me Ushtri për të rimarrë kontrollin direkt të krahinës separatiste. Puidgemont u shkarkua nga posti prej autoriteteve qendrore në Madrid. Ai foli gjatë një interviste radiofonike në Belgjikë, ku ka shkuar pasi iku nga Spanja, pak para se ndaj tij të shpallej një urdhër arresti europian për rebelim dhe përvetësim. Puigdemont, gjithashtu, bëri thirrje që të gjitha partitë pro pavarësisë së rajonit të bashkohen kundër ‘ represionit brutal’ të Spanjës, pasi një sondazh tregoi se separatistët do të formonin shumicën nëse bashkoheshin në zgjedhjet e 21 dhjetorit. Ai u bëri thirrje grupeve politike të qëndrojnë së bashku kundër veprimeve të Madridit, në të kundërt do të shohin shtetin spanjoll ‘ të fitojë këtë luftë’. Puidgemont, 54 vjeç, ka vetëm disa orë kohë për të rënë dakord për një pakt zgjedhor me partitë e tjera pro pavarësisë. Sondazhet sugjerojnë se partitë separatiste do të fitonin mjaft vota të kombinuara për të mbajtur një shumicë në Parlamentin katalanas. Puigdemont dhe udhëheqësit e tjerë separatistë përballen me akuza për rebelim, trazira, keqpërdorim të fondeve publike, mosbindje dhe shkelje të besimit të publikut për organizimin e një referendumi të paligjshëm të pavarësisë, më 1 tetor, dhe më vonë shpalljen e një republike katalanase, kundër Kushtetutës së Spanjës. Në një intervistë me “Radio Catalunya” të martën, Puigdemont tha se të gjitha partitë që qëndrojnë në rajon duhet të bashkohen kundër veprimeve të Madridit. Ai gjithashtu i bëri thirrje qeverisë spanjolle të pezullojë nenin 155, të cilin Kryeministri Mariano Rajoy e miratoi muajin e kaluar për të sunduar Katalonian direkt nga Madridi, përpara votimit të dhjetorit. “Ideale do të ishte një listë e gjerë rajonale e partive ... PDeCAT, CUP, Podemos, ERC ... që kërkojnë demokraci dhe liri”, tha Puigdemont duke shtuar se, “Shteti spanjoll është duke bërë një represion brutal ... Nëse nuk luftojmë shtypjen së bashku, shteti spanjoll mund të fitojë këtë luftë”. Afati për të krijuar aleancën, skadonte të martën në mesnatë. UNITED NATIONS DEVELOPMENT PROGRAMME