Deklarata e Forumit të Pavarur të Rektorëve
Këto ditë u organizua takimi i tretë vjetor i Forumit të Pavarur të Rektorëve ( FPR), në të cilin bëjnë pjesë rektorët e universiteteve private të vendit. Forumi trajtoi me ndjenjë të lartë përgjegjësie një sërë problemesh që kanë të bëjnë me ecurinë e reformës në arsimin e lartë. Ai theksoi se përfundimi i procesit të vlerësimit të cilësisë nga një agjenci britanike dhe i akreditimit të të gjitha institucioneve të arsimit të lartë shënon një stad të ri në procesin e zhvillimit të arsimit universitar në vendin tonë. Me këtë proces vlerësimi, sektori privat i arsimit të lartë jo vetëm u legjitimua përfundimisht, por edhe provoi meritat e tij. Debati mbi epërsinë e sektorit shtetëror ndaj atij privat në arsimin e lartë tashmë mund të konsiderohet tërësisht i tejkaluar. Sot, arsimi i lartë në vendin tonë nuk do të mund të përfytyrohej dot pa sektorin privat në këtë sferë të rëndësishme të jetës së shoqërisë shqiptare.
Momenti i krijuar nuk duhet lënë të bjerë. FPR gjykon se është koha për të reflektuar dhe për t’u gjetur zgjidhje përfundimtare shumë prej problemeve që kanë mbetur pezull pas miratimit të Ligjit për Arsimin e Lartë dhe Kërkimin Shkencor në Institucionet e Arsimit të Lartë, më shumë se dy vite më parë.
FPR ( Forumi i Pavarur i Rektorëve) kërkon thirrjen sa më parë të Konferencës së Rektorëve të të gjitha institucioneve të arsimit të lartë të vendit, siç sanksionon neni 16 i Ligjit për Arsimin e Lartë. Kjo konferencë, e cila ka dështuar të mblidhet për dy vite me radhë, do t’i jepte një impuls të ri bashkëpunimit mes institucioneve të arsimit të lartë për realizimin e reformës.
FPR – Forumi i Pavarur i Rektorëve kërkon nga Ministria e Arsimit, Sportit dhe Rinisë dhe nga qeveria shqiptare miratimin sa më parë të akteve nënligjore që do të mundësonin zbatimin e Ligjit për Arsimin e Lartë dhe Kërkimin Shkencor. Vonesa e pajustifikuar për më se një vit e miratimit të këtyre akteve ka sjellë mjaft amulli, pasiguri, mungesë besimi dhe një deficit të madh kohor që i kanë vonuar rezultatet e pritshme të reformës. Në procesin e hartimit të tyre grupi i punës të mos ndikohet nga fryma etatiste, por të shmangin mbirregullimin, gjë që është në të njëjtën frymë për reformat e kryera nga Kryeministri.
FPR – Forumi i Pavarur i Rektorëve kërkon zhbllokimin e menjëhershëm të procesit të miratimit dhe licencimit të programeve të reja të studimit në universitetet dhe në institucionet e tjera të arsimit të lartë dhe thjeshtëzimin e procedurave burokratike, pa hequr dorë nga kërkesa për standarde akademike sa më të larta.
FPR – Forumi i Pavarur i Rektorëve gjykon se është e domosdoshme që Ministria e Arsimit, Sportit dhe Rinisë dhe Këshilli i Ministrave të evidentojnë dhe me transparencë t’i njoftojnë publikut shqiptar koston që përballon buxheti i shtetit për çdo student në universitetet shtetërore, cilësia e të cilave lë shumë për të dëshiruar.
Pas 15 vitesh që nga krijimi i sektorit privat në arsimin e lartë, ky Forum kërkon barazi të plotë në trajtimin e të gjitha subjekteve që veprimtari të tyre kanë arsimin e lartë dhe kërkimin shkencor. FPR – Forumi i Pavarur i Rektorëve vlerëson se i duhet dhënë fund mentalitetit dhe praktikave që u mundësojnë universiteteve shtetërore të përfitojnë çdo liri të tregut, si edhe çdo privilegj të shtetit. Liria e tregut kërkon që të gjitha institucionet e arsimit të lartë të vihen në një garë të ndershme mes tyre dhe, po kështu, privilegjet nga shtetit të mund të meritohen.