Meta në Medvegjë: U ndjeva më mirë se në vendlindje
“Nga Medvegja dua të theksoj se e ardhmja e popujve tanë dhe e të gjithë rajonit është në Bashkimin Europian”
Presidenti i Republikës, Ilir Meta, zhvilloi një vizitë njëditore në Komunën e Medvegjës, në Serbi.
Kreut të shtetit i është bërë një pritje e ngrohtë në pikën kufitare të Mutivodës, ku edhe u prit nga kryetari i trupës koordinuese për Preshevën, Bujanocin e Medvegjën, Zoran Stankoviç, kryetari i Komunës së Medvegjës, Nebojsha Arsiç, dhe nënkryetarja e Komunës së Medvegjës, Leme Xhema. Gjatë këtij takimi, Presidenti Meta falënderoi shqiptarët dhe drejtuesit vendorë për pritjen e ngrohtë dhe shprehu kënaqësinë e tij për vizitën që po zhvillonte. Meta deklaroi se politika duhet t’i kushtojë më shumë vëmendje shqiptarëve në këto zona dhe kërkoi që edhe vizita e tij të kontribuonte në këtë drejtim. “Kjo është një ditë shumë e bukur për mua. Ndihem i emocionuar që ndodhem sot pranë jush. Politika duhet t’u kushtojë më shumë vëmendje shqiptarëve këtu dhe këtyre zonave. Shpresoj që kjo vizitë e imja të kontribuojë në këtë drejtim. Nga Medvegja dua të theksoj se e ardhmja e popujve tanë dhe e të gjithë rajonit është në Bashkimin Europian dhe kjo mund të realizohet vetëm duke bashkëpunuar më ngushtë me njëri- tjetrin”, deklaroi Meta. Sipas burimeve, mësohet se vizitën e Presidentit Meta në Medvegjë e ndoqi nga afër edhe ambasadori i OSBE për komunën e Medvegjës. Gjithashtu, vizitën e përcollën edhe disa ambasadorë të huaj perëndimorë të akredituar në Beograd. Kreu i shtetit ka folur në Medvegjë për mediat kosovare dhe ato serbe e ka uruar që Beogradi të marrë vendimin e duhur, në kohën e duhur për pavarësinë e Kosovës. Gjatë kësaj deklarate për mediat, kreu i shtetit shqiptar është shprehur se gjatë vizitës së zhvilluar në Medveg- jë, është ndjerë më mirë se në vendlindjen e tij. “Në Medvegjë u ndjeva më mirë se në vendlindjen time. Shqiptarët në Medvegjë, Bujanoc e Preshevë gjithmonë janë në vëmendjen time”, është shprehur Presidenti Meta. Përfaqësues të komunitetit shqiptar në Medvegjë dhe të diasporës shqiptare nga Medvegja, që jetojnë në vende të ndryshme të botës, janë takuar dje në mbrëmje me Presidentin Ilir Meta. Duke i uruar mirëseardhjen dhe duke e falënderuar për vëmendjen, përfaqësuesi i diasporës shqiptare të Medvegjës, Fadil Selmani, në emër të tyre, i ka dhënë Presidentit Meta një pllakat falënderimi dhe monografinë e shoqatës humanitare “Medvegja”.