Panairi i Tiranës, 350 ekspozues nga 25 shtete
Panairi Ndërkombëtar i Tiranës- UFI Approved Event ( UFI- Organizata Globale e Panaireve dhe Ekspozitave), erdhi edhe këtë vit si një nga evenimentet më të rëndësishme, i cili i përligj Shqipërisë cilësimin si portë hyrëse drejt Ballkanit. Një realitet me mbi 200 milionë konsumatorë, 75% e shifrave tregtare me EU, e pa përfshirjen e të cilit, nuk do të kishte Bashkim Europian të përmbushur. Edhe ky edicion iu përmbajt traditës së edicioneve paraardhëse, me mbi 350 ekspozues të drejtpërdrejtë dhe vizitorë nga mbi 25 shtete, që u bënë pjesë e edicionit të radhës së Klik Ekspo Group. Ekspozuesit dhe vizitorët që erdhën për herë të parë, kanë ndeshur mikpritjen, si tipar të veçantë të shqiptarëve dhe ata të cilët u rikthyen me përvojën e një viti më parë, e përjetojnë Tiranën këtë vit si të pandarë nga kryeqytetet europiane.
RAMA
Vlerësimet nuk munguan as nga Kryeministri Rama, i cili në fjalën e tij përshëndetëse mbajtur në ceremoninë e hapjes u shpreh: “Ky panair, çdo vit e më shumë, i ngjan ambicies që organizatorët e tij patën në vitin 1994, kur guxuan të imagjinojnë një aktivitet të tillë në kushte të pakrahasueshme me kushtet e sotme, besuan te potenciali i ekonomisë së këtij vendi, kur ishin të pak- të ata që besonin se vërtet në ato kushte mund të merrte udhë kjo nismë, e cila sot është materializuar në një edicion të ri, me një prani shumë herë më të madhe dhe të larmishme. Sfidat janë të mëdha, janë shumë më komplekse dhe vetëm fuqia e imagjinatës dhe besimit mund të na bëjë të gjithëve, që t’u qasemi sfidave me mundësinë reale për t’i fituar ato”. Duke folur për investimet e huaja, Rama vuri në dukje se tashmë kompanitë e huaja që do të investojnë, do të gjejnë në Shqipëri partnerë të besueshëm për të investuar. “Kompanitë e huaja që vijnë sot, jo vetëm mund të gjejnë mundësi të reja investimi, por mund të gjejnë dhe partnerë të besueshëm, me të cilët mund të bashkohen dhe të synojnë realizimin e ambicieve për të investuar dhe për të fituar përmes sipërmarrjes në këtë vend.”
PANAIRI
Pjesë e panairit 4- ditor u bënë pavijoni i Republikës Popullore të Kinës dhe pavijoni i Republikës së Serbisë. Çka i bashkon të dyja këto pavijone, njërin nga kontinenti i largët dhe tjetrin nga më i vjetri, është të konsideruarit të Shqipërisë dhe Tiranës, si pikënisja e strategjive gjeoekonomike. E para vjel oportunitetet që ofron vendi në investimet në sektorët strategjike duke u përfaqësuar me kompani të profilit të lartë fortune 500, dhe e dyta, Serbia, pa Tiranën, nuk do ta quante të ndërkombëtarizuar komunitetin e saj të sipërmarrjes. Më tej, pavijoni i Bosnjë Hercegovinës, nën kujdesin e Dhomës së Tregtisë me Jashtë, prania e shtuar e sipërmarrësve nga Kosova me ndërmarrje prodhuese, prani institucionale nga Austria nën kujdesin e Zyrës Ekonomike Advantage Austria Albania ( mbi 20 sipërmarrje), mbi 50 ekspozues nga Italia me këmbënguljen e përvitshme dhe rrjedhshmërinë natyrale të ortakërisë ekonomike e sociale. Të pranishëm që nga ndërmarrjet publike, deri te propozimet me peshë në industrinë e menaxhimit të mbetjeve, energjitë alternative, mbrojtjes dhe sigurisë në përpjekje jo vetëm për të promovuar, por edhe për të krijuar realitete të prekshme prodhuese në Shqipëri. Greqia dëshmon partneritet në çdo edicion me prani që përshkojnë hierarkinë nga SME- të tek industrialistët; Maqedonia, Mali i Zi, Republika e Çekisë, Hungaria, Kroacia, Turqia, të pranishëm individualisht apo të përfaqësuar si trade- partners. Ndërkohe, Sallonet Monosektoriale, në katër hollet e ekspozimit në Pallatin e Kongreseve, ishin të orientuara drejt prioriteteve si, Mjedisi dhe përftimi i energjisë, Libri dhe Media, Tregu i Sigurimeve dhe Institucioneve Financiare, Mbrojtja dhe Siguria. Panairi Ndërkombëtar kremtoi këtë edicion edhe realizimin e një nismë gjithëpërfshirëse për argumente që na përkasin të gjithëve, por më shumë janë trashëgimi për brezat që do të vijnë. Kemi shtuar argumente jetësore për Mbrojtjen e Mjedisit, që tregojnë qytetarí dhe largpamësi mbi të gjitha. Ekspokongresi për Mjedisin dhe Menaxhimin e Mbetjeve– Western Balkans Waste Soltutions, u përftua nga sinergjia mes Klik Ekspo Group e në tjetrën anë, G& G Studio, Unioni i Ekspertëve Mjedisorë dhe mbi 12 Universitete. Kalendari i eventeve dytësore, që gërsheton biznesin me kulturën, kërkimet shkencore me praktikat më të mira, traditën me risitë teknologjike, u pasurua me Forume të rëndësishme Ekonomike Ndërkombëtare si ai Shqipëri- Republika Popullore e Kinës si dhe Forumi i Biznesit Shqipëri- Serbi. Panairi i Tiranës, vetiu përfaqëson produktin kult të turizmit kongresual, që ngarend kryeqytetin me gjithë përfitimet që i përcjell: të punësuarit e përfshirë, me kohë të pjesshme e të plotë, dhe të rinjtë që kalojnë kohë të lirë cilësore, shërbimet e akomodimit që përfshijnë mbi 10 hotele të Tiranës, shërbime restorantesh dhe nightlife, transport urban, impulse telefonike etj.