Maxhoranca drejt prokurorit të përkohshëm

Basha: Kryeprokurorin s’mund ta emërojë Tahiri, Sejdini dhe Dako

Mbarimi i mandatit të Prokurorit të Përgjithshëm, Adriatik Llalla, ka ndarë edhe më shumë maxhorancën dhe opozitën. Në pamundësi të ngritjes së Këshillit të Lartë të Prokurorisë, burime nga maxhoraca pohojnë se do të shkohet në zgjedhjen e një prokurori të përkohshëm deri në zgjedhjen e Prokurorit të ri të Përgjithshëm. Kryetari i Partisë Demokratike Lulzim Basha është shprehur se nuk do të lejojë zgjedhjen e prokurorit të ri nga Edi Rama. “Qëndrimet tona kanë qenë dhe janë të qarta: Prokurorin e Përgjithshëm nuk mund ta emërojë Edi Rama. Ky që ndërmori këtë sulm të ashpër ndaj prokurorëve, vetëm sepse kërkuan hetimin dhe arrestimin e Saimir Tahirit, nuk mund të emërojë Prokurorin e Përgjithshëm, as deputetët e Partisë Socialiste që e mbrojtën duke i mbajtur imunitetin nuk mund të emërojnë Prokurorin e Përgjithshëm. Nuk mund të emërojnë Prokurorin e Përgjithshëm miqtë e Saimir Tahirit, Vangjush Dakos, Qazim Sejdinit”, është shprehur Basha. Por misionet amerikane dhe europiane të ndihmës juridike, OPDAT dhe EURALIUS, kanë dhënë rekomandimet mbi mënyrën se si duhet vepruar për drejtimin e Prokurorisë së Përgjithshme pas përfundimit të mandatit të Kryeprokurorit aktual Adriatik Llalla. Sipas ekspertëve ndërkombëtarë, mandati i Adriatik Llallës nuk mund të zgjatet dhe në vend të tij zgjidhet një prokuror me funksione të përkohshme, dhe se për votimin e tij mjafton shumica e thjeshtë në Parlament. Në arsyetimin e ekspertëve të Eruralius dhe Opdat, hidhet poshtë kategorikisht hipoteza e një zgjatjeje të mandatit të Kryeprokurorit aktual. Sipas ekspertëve ndërkombëtarë, “nuk ka autoritet kushtetues ose ligjor për Parlamentin që të zgjasë mandatin e Prokurorit të Përgjithshëm aktual, mbas skadimit të mandatit të tij. Përkundrazi, ekziston një dispozitë e qartë, që urdhëron emërimin e një Prokurori të Përgjithshëm të përkohshëm”, saktësohet në përfundimet e tyre. Ekspertët ndërkombëtarë i referohen dispozitave kalimtare, të cilat parashikojnë se “në rast se mandati i Prokurorit të Përgjithshëm përfundon para kohe, para themelimit të Këshillit të Lartë të Prokurorisë, funksionet e Prokurorit të Përgjithshëm do të caktohen me vendim të Asamblesë përkohësisht, në nga një nga prokurorët më me përvojë nga radhët e prokurorëve që plotësojnë kërkesat dhe kriteret e parashikuara në një tjetër kapitull të ligjit.