PD, rezolutë kundër dhunës në familje

Vokshi: Janë ditët për të reaguar kundër dhunës qeveritare

Partia Demokratike ka kërkuar mocion me debat për dhunën në familje dhe ka depozituar në Kuvend një rezolutë për këtë çështje. Me nismën e Partisë Demokratike në Kuvendin e Shqipërisë, do të zhvillohet më 4 dhjetor një mocion me debat për masat kundër dhunës në familje, i cili përkon me Ditët ndërkombëtare të Sensibilizimit Kundër Dhunës ndaj Grave dhe Vajzave, 25 nëntor- 10 dhjetor. Partia Demokratike thekson se nëse do të zbatohen masat e kërkuara prej saj në rezolutën e depozituar në Kuvend, do të ulet ndjeshëm dhuna në familje. Rezolutën kundër dhunës në familje e kanë firmosur 10 deputetë demokratë, mes të cilëve edhe kreu i PD- së, Lulzim Basha. Sipas deputetes demokrate, Albana Vokshi, e cila është edhe një nga hartueset e rezolutës, qeveria s’ka ndërtuar asnjë mekanizëm efikas për parandalimin e dhunës në familje. “Këto janë ditët kur ne nuk duhet të heshtim. Këto janë ditët për të reaguar njëzëri kundër dhunës qeveritare, që fillon nga Kryeministri edhe përhapet si epidemi në të gjitha format e saj në çdo institucion! Nëpërmjet propagandës qeveria po tenton të mbulojë dështimin spekta- kolar të saj për të mbrojtur gratë e fëmijët, pa kërkuar ndjesë se në 4 vite qeverisje nuk arritën të mbrojnë asnjë viktimë të dhunës në familje, një prej tyre edhe gjykatëse”, deklaroi Vokshi. Në rezolutën e saj, PD kërkon mbikëqyrje të fortë parlamentare dhe trajtim të denoncimeve për dhunën në familje. Brenda 15 ditëve Kuvendi krijon komision të posaçëm për trajtimin ligjor të fenomenit dhe brenda 60 ditëve qeveria të bëjë analizën, të paraqesë të dhënat, të krijojë regjistrin kombëtar për dhunën në familje.