Pavarësia, qeveritë e Shqipërisë e Kosovës në Korçë dhe Vlorë
Qeveritë e Shqipërisë dhe Kosovës do të zhvillojnë mbledhje të përbashkëta sot në qytetin e Korçës dhe më 28 nëntor, në Vlorë. Mbledhja, e cila është në kuadër të takimit të përbashkët të dy qeverive, është e katërta që zhvillohet në harkun kohor të pesë viteve të fundit, ku dy prej mbledhjeve janë zhvilluar në Kosovë. Me sloganin “Një tokë- një popull- një ëndërr”, dy qeveritë pritet të nënshkruajnë një sërë marrëveshjesh bashkëpunimi mes tyre. Sipas axhendës së përcaktuar mes dy qeverive, mbledhja që do të mbahet në qytetin e Korçës do të nisë në orën 16: 00 dhe në të janë parashikuar të nënshkruhen katër marrëveshje. Sipas burimeve, pritet që të nënshkruhet një memorandum bashkëpunimi mes Ministrive të Mjedisit, për mbrojtjen dhe zhvillimin e mjedisit. Edhe Ministritë e Kulturës së dy vendeve pritet të nënshkruajnë një memorandum mes tyre për bashkëpunimin në fushën e kulturës, si dhe do të ketë një marrëveshje mes dy Ministrive të Bujqësisë për njohjen bilaterale të certifikatave veterinare për produktet shtazore mes dy vendeve. Pjesë e marrëveshjeve pritet të jetë edhe një bashkëpunim për diasporën. Sipas axhendës së paracaktuar, do të ketë edhe një memorandum mirëkuptimi mes agjencisë AIDA dhe agjencisë kosovare KIESA për nxitjen e investimeve. Marrëveshje gjatë mbledhjeve dyditore të dy qeverive do të ketë edhe për njohjen e kontributeve shoqërore të shqiptarëve që punojnë në Shqipëri e Kosovë dhe Ministrive të Jashtme, në funksion të integrimit europian të dy shteteve. Këto marrëveshje dhe memorandume të nënshkruara nga dy qeveritë do të bëhen publike nëpërmjet një konference të përbashkët të kryeministrit shqiptar, Edi Rama, dhe atij të Kosovës, Ramush Haradinaj. Mbledhja e përbashkët që do të zhvillohet mes dy qeverive në Vlorë, do të mbahet në Shtëpinë e Flamurit. Në përfundim të kësaj mbledhjeje, përfaqësuesit e dy qeverive do të marrin pjesë edhe në festimet që do të mbahen në Vlorë për festën e flamurit. Pas ceremonisë, do të shpallet zyrtarisht edhe logoja e vitit mbarëkombëtar të Gjergj Kastriot Skënderbeut.