Drogë nga Himara në Greqi, snajperi plagos trafikantin
Në ndjekje hodhën drogën në det, në gomone u gjetën 1.6 tonë
Pas mbi 24 orë ndjekje, Policia greke ka arritur të kapë një gomone transoqeanike të mbushur me drogë.
Mediat greke e quajtën operacionin më të madh të Policisë Kufitare greke në këto vite. Organet policore dhe informative greke kishin siguruar informacion prej disa javësh për një grup të strukturuar ndërkombëtar droge në linjën Shqipëri- Greqi- Itali dhe kanë marrë informacion për nisjen e një ngarkese në orët e para të së premtes nga jugu i Himarës për në Greqi. Policia greke e ka pritur mjetin lundrues në veri të Korfuzit me disa skafe të saj, por është përballur me një gomone të gjatësisë 12 metra dhe me tre motorë nga 350 kuaj- fuqi secili, ndër mjetet më të shpejta që ishte përballur ndonjëherë. Sapo kanë vënë re prezencën e Policisë, trafikantët janë drejtuar për në jug të Korfuzit. Në ndjekje të tyre janë vendosur skafet e të paktën 5 porteve detare greke, një avion e më pas edhe një helikopter me forcat speciale amfibe dhe snajperë. Operacioni ka përfunduar pikërisht pasditen e së shtunës pranë ishullit Xia në Athinë, ku gomonia është ndaluar pas të shtënave nga snajperët. Policia greke ka ndaluar tre drejtuesit e saj, dy shqiptarë e një italian, të cilët bashkë me gomonen janë transportuar drejt portit të Pireut. Nga gomonia është nxjerrë me barelë një nga skafistët, për të cilin, sipas policisë, thuhet se është plagosur, por nuk saktësohet nga të shtënat e policisë greke apo nga lëvizja e gomones. Ndërkaq, pasditen e djeshme Policia greke ka dalë në një deklaratë për shtyp ku ka dhënë detajet për operacionin antidrogë. Sipas Policisë, janë sekuestruar 1.6 tonë marijuanë. Janë arrestuar në zona të ndryshme të Athinës 10 pjesëtarë të organizatës ndërkombëtare të drogës, përfshirë dhe 3 drejtuesit e gomones. Operacioni ka nisur pas grumbullimit të informacionit mbi një organizatë ndërkombëtare të trafikut të drogës me mjete të shpejta ujore, e cila vepronte në mënyrë sistematike. Policia kishte informacion mbi emrat e pjesëtarëve të
Brenda në gomone u ndaluan dy shqiptarë dhe një italian, njëri prej të cilëve u transportua me autoambulancë drejt spitalit “Evagelismos” të Athinës, sapo mbërriti në portin e Pireut, për shkak të disa lëndimeve”
organizatës, veprimet e tyre, të dhëna mbi gomonen etj., dhe për këtë organizoi operacionin ku morën pjesë skafe të policisë, avion i FRONTEX, helikopterë dhe snajperë. Gomonia u vrojtua teksa hyri në brigjet shqiptare, u ngarkua aty dhe në kthim, teksa u fut në ujërat greke, nisi ndjekja. Trafikantët hapën zjarr ndaj një skafi të Policisë greke. Skafi i policisë iu kundërpërgjigj, por teksa kreu manovra, disa policë ranë në det duke u plagosur. Përfundimisht gomonia u ndalua midis Makronisit dhe ishullit Kea pas goditjes nga snajperët që ndodheshin në helikopter, të cilët kanë vepruar në kushte të vështira për shkak të shpejtësisë së madhe të gomones dhe errësirës. Brenda në gomone u ndaluan dy shqiptarë dhe një italian, njëri prej të cilëve u transportua me autoambulancë drejt spitalit “Evagelismos” të Athinës, sapo mbërriti në portin e Pireut, për shkak të disa lëndimeve. Operacioni vijoi me disa arrestime, konkretisht katër shqiptarë të tjerë, një italian, një bullgar dhe një grek, ndërsa disa janë shpallur në kërkim, duke e çuar numrin e të arrestuarve në 10. Duhet thënë se trafikantët kanë hedhur në det gjatë ndjekjes edhe sasi të tjera droge, armë dhe materiale të tjera, megjithatë veç drogës dhe gomones me 3 motorë nga 350 kuaj- fuqi secili, u sekuestrua gjatë kontrolleve dhe një tjetër gomone me 4 motorë nga 350 kuaj- fuqi secili, disa armë dhe materiale të tjera. Vijon bashkëpunimi me agjenci të tjera europiane për zbardhjen e veprimtarisë së këtij grupi kriminal. Ministri grek i Mbrojtjes, Panajotis Kurumplis, dhe zv. ministri Nektaros Santorinios i shprehën falënderimet shefit të Policisë Kufitare greke, Stamatio Rapti, dhe efektivëve të kësaj policie.