Sot shpallet rezultati, Ahmeti i VV mban Prishtinën
LDK nuk e pranon rezultatin, kërkon rinumërimin e votave
Komisioni Qendror i Zgjedhjeve në Kosovë pritet të shpallë sot rezultatet përfundimtare për raundin e dytë të zgjedhjeve lokale, i cili është mbajtur më 19 nëntor.
Zëdhënësi i KQZ- së, Valmir Elezaj, bëri të ditur se do të bëhet futja e të dhënave nga numërimi dhe rinumërimi dhe pastaj do të dalin rezultatet përfundimtare të raundit të dytë të zgjedhjeve për kryetar të komunave, të mbajtur më 19 nëntor. Ai tha se pas shpalljes së rezultateve përfundimtare, është afati 24 orësh i subjekteve politike për të paraqitur ankesat e tyre në PZAP. Nga numërimi, Shpend Ahmeti ka marrë 861 vota me kusht, ndërsa Arban Abrashi 733. Kjo do të thotë se kandidati i Vetëvendosjes ka marrë 128 vota më shumë në kutitë e votave me kusht dhe ato me postë. Llogaritur në total, Ahmeti ka dalë me 365 vota më shumë, duke fituar edhe një mandat në krye të Prishtinës. Ahmeti e fitoi garën në Prishtinë vetëm pasi bëri koalicion me AKR- në dhe Rrahim Pacollin. Ahmeti garoi shumë ngushtë me Arban Abrashin e LDK- së. Sipas rezultateve të publikuara në fund të procesit, Shpend Ahmeti i Vetëvendosjes ka marrë 42,262 vota, ndërsa Arban Abrashi i LDK- së ka marrë 41,897 vota.
QËNDRIMI I LDK Por Partia LDK e Arban Abrashit nuk e ka pranuar rezultatin e KQZ- së. Lufti Haziri i LDK- së tha se s’ka rezultat në Prishtinë, dhe as në Dragash, pa rinumërim të kutive të votimit. “Kërkojmë rinumërimin, derisa nuk ndodh rinumërim, nuk ka rezultat në Prishtinë”, tha ai duke shtuar se do të kërkojnë çdo rrugë ligjore për të kryer rinumërimin për Prishtinën. LDK kishte kërkuar rinumërim të votave, kërkesa ishte pranuar nga Paneli Zgjedhor për Ankesa dhe Parashtresa. Por i njëjti vendim ishte rrëzuar të shtunën nga Gjykata Supreme. LDK ka paralajmëruar se do të bëjnë ankesë në Gjykatën Kushtetuese lidhur me vendimet e Supremes për t’i mundësuar rinumërimin e votave në Prishtinë e Dragash. REAGIMET E PARA TË VV Zyrtarët e Vetëvendosjes, kur ishte marrë vendimi nga PZAP pro rinumërimit, paralajmëruan rrëzimin e Shtetit dhe trazira, sipas “Express”. Dhe gjyqtarët e PZAP i cilësuan si shërbëtorë të ‘ Klanit Pronto’. Ndërsa kur u mor vendimi i Gjykatës Supreme, zyrtarët e Vetëvendosjes deklaruan se drejtësia u vendos në Prishtinë e Prizren. Nuk është sqaruar ende pse ata kërcënuan me trazira thjesht për një rinumërim të votave. Kryetari i Lëvizjes Vetëvendosje, Visar Ymeri, tha se ata që tentuan të manipulojnë, u përmbysen vetë. “Klani Pronto e ai i Isa Mustafës pësuan debakël... U bënë bashkë në zgjedhje kundër VETËVENDOSJE!- s. Mbetën bashkë edhe pas zgjedhjeve. Tentuan të manipulojnë, të mashtrojnë, të shpifin. Përdorën analistë e media, PZAP- in e KQZ- në. Deshën ta përmbysin vullnetin popullor e qytetar, por u përmbysën vetë. U poshtëruan. Dhe nuk do të ngrihen më kurrë”, tha ai.