Super Kamza përmbys Lushnjën, Vllaznia del nga kriza
E pandalshme! Kamza është skuadra që ka siguruar tri pikë të tjera në ecurinë e saj pozitive dhe viktima e radhës ka qenë Lushnja. Ndeshja, e luajtur në stadiumin "Kamza", ka nisur me gol të miqve, ndërkohë që vendësit ia kanë dalë që të përmbysin gjithçka që në fraksionin e parë, me një eurogol të Plakut dhe një autogol të Metos. Tri pikë të tjera për Kamzën që e çojnë në kuotën e 20 pikëve, në vendin e 4- t, me një më pak se Flamurtari. Ndeshja nis vrullshëm për të dyja skuadrat. Sfida do të zhbllokohet shumë shpejt dhe është kombinim mes kapitenit Sefa që pason në qendër për Cankën, i cili nuk gabon dhe shënon. Ky gol e bën "me krahë" Lushnjën, por Kamza nis ndeshjen e saj. Kalojnë vetëm shtatë minuta dhe Plaku kalibron në mënyrë perfekte një goditje dënimi në trekëndëshin e Spahos për të rivendosur ekuilibrat. Kamza shton presionin dhe në të 41ën shpërblehet. Një aksion nga e djathta bën që pasimi perfekt në qendër për Raçiç të devijohet në rrjetë nga Meto, i cili shkakton autogol. Kur kro- nometri ndaloi në minutën e fundit të kohës së rregullt, Gava kishte të gjithë mundësitë që të shtangte Kamzën, kur me një pasim të Maganit nga e djathta përpara portës, gabon në goditje dhe sfera përfundon jashtë. Kur kronometrohej e fundit minutë e kohës shtesë, e gjithë Lushnja ishte në sulm së bashku me portierin, por një kundërsulm i Nezirit mund të sillte golin e tretë për vendësit, por goditja bllokohet prej mbrojtësit të fundit.
VLLAZNIA- LUFTËTARI
Vllaznia i është rikthyer rrugës së fitoreve, pasi dje ka arritur të sigurojë një tjetër trepikësh të domosdoshëm përballë Luftëtarit në stadiumin "Loro Boriçi". Nën një shi të rrëmbyeshëm, kuqeblutë kanë triumfuar dhe i janë shkëputur fundit të tabelës së klasifikimit, ndërsa kanë zhytur aty Luftëtarin që, edhe pse është munduar shumë dhe ka shpenzuar energji, nuk ia ka dalë të marrë të paktën një pikë në këtë ndeshje. Tashmë bluzinjtë e shohin veten tri pikë larg mbijetesës, çka e vështirëson edhe më shumë punën e tyre në aspektin psikologjik për ndeshjet e ardhshme. Një autogol i Ramadanit dhe më pas Giolamn Lika kanë zhvlerësuar golin e shënuar nga Bregu dhe kuqezblutë kanë nisur të lënë pas krahëve krizën, ndërkohë që gjirokastritët nuk po dinë të marrin rezultate pozitive.