“Zoti i kokainës” nga Amerika e Jugut në Holandë e Itali, kapet i dashuri i Viola Spiros
VALENTIN SALAJ ARRESTOHET NE FIRENCE PER TRAFIK DROGE. NENA E VIOLA SPIROS: PO IA KTHEJNE DASHURINE NE PAZAR
Policia Italiane dhe ajo Holandeze finalizuan një megaoperacion antidroge, duke vënë në pranga 7 persona, që trafikonin kokainë nga Amerika e Jugut, në Roterdam e më pas në Firence.
Një prej të arrestuarve, i konsideruar nga mediat italiane si “zoti i kokainës”, është shtetasi shqiptar Valentin Selaj, i dashuri i moderatores Viola Spiro. Gazeta italiane “La Nazione”, i ka kushtuar një artikull të veçantë çiftit, duke publikuar në faqen e parë foton e të dyve, ku shkruan se i dashuri i prezantueses shqiptare kishte një rol kryesor në trafikun e drogës. Sipas mediave italiane, Valentin Selaj ishte personi që sillte kokainën nga Amerika e Jugut në Firence, duke kaluar më parë përmes Holandës. “Ajo nuk ka asnjë faj. Përveçse është e bukur dhe e zgjedhura e Valentin Selaj, një nga bosët e klanit të shqiptarëve, shkatërruar nga skuadra policore fiorentine me ndihmën e kolegëve holandezë. Viola është një nga femrat më të famshme dhe më të pëlqyera në Shqipëri. E shohim shpesh në kopertina, bën rolin e aktores, modeles, prezantueses. Me pak fjalë, një mbretëreshë mode që ishte mësuar me jetën e bukur, pa e kuptuar që i dashuri i saj shqiptar ishte një nga gjashtë të arrestuarit, për kapjen e të cilit u vë në lëvizje gjysma e policisë së Europës. Ajo është gjithnjë e ndjekur nga paparacët, e preferuara e ekraneve, e dëshiruara e meshkujve, por jo vetëm kaq, ajo ka shëtitur botën për sete fotografike. Sa për operacionin, ajo s’ka të bëjë fare, por një ditë pas operacionit të policisë ku iu arrestua i dashuri, postoi në rrjetet sociale ku ndiqet nga miliona njerëz, dy imazhe të trishtuara. Që nga ai moment, ajo nuk buzëqesh më”, shkruante gazeta italiane “La Nazione”. Operacioni, gjatë të cilit u arrestua Valentin Selaj, është zhvilluar më 17 nëntor në Firence, Amsterdam dhe Roterdam, ku u arrestuan shtatë persona, 6 prej të cilave shqiptarë dhe një polak, të cilët akuzohen si përgjegjës për trafikun ndërkombëtar të drogës. Kokaina dhe marijuana mbërrinin nga Amerika e Jugut deri në Holandë nga ku transportoheshin në Itali dhe Angli përmes makinave me funde të dyfishta dhe të veshura me plumb, që hapeshin përmes një telekomande, me qëllimin për t’iu shmangur kontrolleve të qenve të drogës.