Opozita ndahet për Reformën, Shehi i LZHK: Vidhni votat e njëri- tjetrit
PD- PS, dakordësi për votimin dhe numërimin elektronik të votave
Në mbledhjen e parë të Komisionit të Posaçëm të Reformës Zgjedhore, opozita nuk është treguar e unifikuar për sa i përket ndryshimit apo jo të sistemit zgjedhor. Bashkëkryetari i PD- së, Oerd Bylykbashi tha dje se çështjet që do të diskutoheshin në Komision do të ishte zbatimi i teknologjisë në votimin dhe numërimin elektronik për zgjedhjet e ardhshme. “PD konsideron si element thelbësor që duhet të ketë Reforma Zgjedhore, dekriminalizimin e procesit zgjedhor. Të bëjmë të mundur që procesi zgjedhore të jetë sa më i pastër nga influencat kriminale. Kjo, sigurisht kërkon ndërhyrje në Kod Zgjedhor, mund të kërkojë ndërhyrje dhe në ligje të tjera për të forcuar kornizën ligjore. Një tjetër çështje është forcimi i politikës penale, shitblerja e votës konsiderohet si korrupsion zgjedhor tashmë. Hetimi për këtë vepër penale të kalojë te strukturat e SPAK. Një prioritet shumë i madh është futja e teknologjive në votim, pra, identifikimi biometrik, votimit elektronik dhe numërimit elektronik në procesin zgjedhor. Janë një sërë nga këto procese të kontrolluara nga sjellja kriminale, qoftë zyrtarësh shtetërorë apo politikë dhe nga organizimi kriminal që janë lidhur. Marrja e kartave të identitet për të akaparuar votat, kontrolli i votës nëpërmjet këtij instrumenti apo mohimi i të drejtës së votës janë një shembull në këtë drejtim. Ekziston dhe problemi i korrupsionit zgjedhor të komisionerëve, numërimi i votave, roli i Policisë ne zgjedhje, financimi i partive politike, transparenca e tyre... Gjykoj që këto çështje që lis- toj, ky Komision t’u gjejë zgjedhje”, tha dje Bylykbashi. Por aleati i PD- së, Dashamir Shehi, kërkoi nga demokratët dhe socialistët të jepnin përgjigje për çështjen kryesore, nëse ishin dakord që të ndryshonin sistemin zgjedhor apo jo. “Për sistemin jemi mbledhur, do mbajmë këtë sistem apo do e ndërrojmë sistemin? Se ky është Komisioni, për këtë jemi mbledhur. Unë kam ardhur me shpresën që do ndërrojmë sistemin, kjo është çështja politike e madhe. Do rrimë me sistem proporcional rajonal apo do ta bëjmë proporcional kombëtar, apo maxhoritar. Çfarë është numërimi elektronik? Është çështje teknike. Për këtë çësh- tje do biem dakord? Iku kjo, këtë çështje e mbyllim që sot madje.. Sistemi është kryesori fare, është kryefjala. Nga sistemet derivon, pjesa politike. Ne, te pjesa teknike kemi ardhur nga fatkeqësia jonë, se vjedhim votat e njëri- tjetrit”, tha dje Dashamir Shehi. Por as Oerd Bylykbashi dhe as Blendi Çuçi nuk i dhanë përgjigje. “Besoj se z. Bylykbashi numëroi një numër të konsiderueshëm çështjesh, pavarësisht se ka edhe çështje të tjera.. Unë do të shtoja dhe depolitizimin e klimës në komisione zgjedhore. Dhe këtë frymë, çdokush që ka gjëra për të plotësuar axhendën, sot është dita që mund ta themi”, tha Çuçi. Bashkëkryetari i PS, Çuçi propozoi që të zgjidhen 8 ekspertë për Reformën Zgjedhore që do ndihmojnë Komisionin, por Bashkim Fino dhe Alket Hyseni kanë votuar kundër, pasi sipas tyre, po harxhohen shumë para. Por Fatmir Mediu ka ironizuar Finon duke i thënë: “Edhe kujt ju bë vonë se je kundër?”.