Veliaj: Kashari dhe Vora të pastrojnë kanalet
Përmbytjet, UKT: Bovilla nuk furnizon me ujë qytetin
Kryebashkiaku i Tiranës, Erion Veliaj, inspektoi dje zonat periferike ku situata e përmbytjeve ka qenë më problematike, pas reshjeve të dendura të mbrëmjes së ditës së enjte. Veliaj ka ndjekur nga afër punën që po bëjnë ndërmarrjet e Bashkisë së Tiranës në Njësinë 6, në mënyrë të veçantë në rr. "Shaban Bardhoshi" dhe në zonën e ish- Pularisë, ku situata, për shkak edhe të ndërtimeve pa kriter, është shfaqur problematike. Kryebashkiaku tha se situata në zonën urbane të Tiranës është normalizuar, ndërsa nënvizoi se për momentin problem mbeten zonat rurale. Një nga çështjet për të cilat mbetet sfidë për Bashkinë e Tiranës në orët në vazhdim është ajo që ka të bëjë me furnizimin me ujë. "Disa nga nënstacionet që pompojnë ujë, përveç stacioneve elektrike, janë jashtë funksionit, sidomos ai i Laknasit, Bërxullit, në zonën e Kasharit. Kjo do të thotë që derisa të stabilizohet ai nënsta- cion, që të furnizojë depot me energji, që pastaj mund të pompojnë ujin, do të kemi problematikë në rrjetin e ujit të pijshëm. U kërkoj të gjithë qytetarëve që ta përdorin me kursim ujin e pijshëm, duke qenë se jemi në një situatë problematike në orët e ardhshme", bëri të ditur Veliaj. Ai u bëri më tej apel kolegëve kryebashkiakë. "Kam një apel për kolegët e bashkive të tjera, nuk mjafton që të pastrojmë vetëm ne në Tiranë, sepse në qoftë se nuk pastrohet edhe kanali në Vorë, edhe kanali në Kamëz, atëherë sigurisht krijohet një efekt tapë dhe shumë prej problemeve që ju patë në zonën kufitare mes Vorës dhe Tiranës, në disa akse në qendrat tregtare apo edhe në anën tjetër të bregut të lumit, kërkon pak ndihmë edhe nga bashkitë fqinje", tha Veliaj. Ndërkohë që dje UKT ka njoftuar se liqeni i Bovillës është turbulluar nga reshjet dhe për pasojë nuk funksionon. "Nga resh- jet e dendura është shkaktuar turbullirë në liqenin e Bovillës, për pasojë impianti i përpunimit të ujit të Bovillës momentalisht nuk është në funksion. Në zonat e mëposhtme do të ketë kufizime të furnizimit me ujë deri në rikthimin e energjisë elektrike dhe përmirësimit të situatës: Kinostudio, Xhamlliku, Allias, Pazari i Ri, rr. "5 Maji", Laprakë, Rr. e Kavajës, Rr. e Durrësit, zona e "Vasil Shantos" dhe Yzberishti", thuhet në njoftimin e UKT.