Basha me kryebashkiakët e PD, akuza për palmat dhe hapjen e rezervuarëve
Drejtuesit vendorë të Kamzës dhe Vorës, Xhelal Mziu dhe Fiqiri Ismaili, kanë akuzuar për përmbytjet e zonave të administruara prej tyre qeverinë dhe Bashkinë e Tiranës për mbjelljen e palmave dhe shkarkimin pa paralajmërim të liqenit të Bovillës dhe Kasharit. Sipas kreut demokrat të Bashkisë së Vorës, Fiqiri Ismaili, dëmi i sjellë nga mbjellja e palmave është i disafishtë.
“Arsyeja e parë është shkarkimi pa paralajmërim nga liqeni i Kasharit. Arsyeja e dytë është bllokimi i kanaleve kulluese nga mbjellja e palmave prej Bashkisë së Tiranës. Mbjellja e palmave kushtoi 600 mijë euro, por dëmi i tyre është i disafishtë. Për zëvendësimin e tyre, jo vetëm do të shpenzohen edhe 2.5 milionë euro të tjera, por prej tyre është shkatërruar autostrada Tiranë- Durrës, si dhe qindra biznese”, tha Ismaili. Në krah të kreut të PD- së, Lulzim Basha, edhe kreu i Bashkisë së Kamzës, Xhelal Mziu, ka akuzuar bashkinë për hapjen e liqenit të Bovillës, që ka shkaktuar përmbytje të shumta në Kamzë. “Kanë hapur Bovillën mbrëmë në kulmin e ujit. Ata e dinin se si do të shkonte situata, mund ta kishin hapur pardje, le të themi. Ka ardhur presioni i ujit dhe ka shpërthyer në të gjithë zonën e Kamzës”, tha Mziu. Kreu i opozitës, Lulzim Basha, në krah të familjeve të mbytura në Bashkinë e Kamzës, kërkoi që pavarësisht vështirësive, t’i qëndrohet pranë çdo banori në nevojë. “Situata do të përkeqësohet prapë sonte. Të nxjerrim njerëzit, të shpëtojmë njerëzit. Mos të rrinë pas lopëve, por të shpëtojnë njerëzit, pastaj hap pas hapi të tjerat. Vëmendja kryesore duhet pasur te jeta e njerëzve”, ka deklaruar Basha.