"Stuhia" godet hajdutët e serviseve, 2 të arrestuar
Autorët tentuan të grabisin kasafortën e karburantit në Kamzë
Dy persona janë arrestuar dhe tre të tjerë janë shpallur në kërkim, si pjesë e një grupi që grabiste servise makinash e biznese të ndryshme në Tiranë.
Gjatë operacionit të koduar "Stuhia", u bë i mundur arrestimi i dy të rinjve në Kamzë, 21- vjeçarit Ardit Elezi dhe 19- vjeçarit Adrian Prela. Gjithashtu, gjatë operacionit, Policia sekuestroi edhe një pistoletë tip "Bereta" që e mbanin pa leje. "Specialistët e Seksionit për Krimet në Komisariatin Nr. 5, në vijim të punës së tyre për zbardhjen e ngjarjeve të ndodhura, përfshirë vjedhjet e kryera vetëm apo në bashkëpunim, si edhe për kapjen e arrestimin e autorëve kryerës të këtyre veprave penale, nisur nga një punë e mirëfilltë hetimore kanë arritur të finalizojnë me sukses operacionin policor të koduar ' Studia'", tha dje Policia e Tiranës. Në kuadër të këtij operacioni dhe në përfundim të finalizimit të tij, është bërë e mundur kapja dhe arrestimi i dy të rinjve, Elezi e Prela, si dhe u bë shpallja në kërkim i bashkëpunëtorëve të tjerë, shtetasve me iniciale M. Gj., 34 vjeç, banues në Valias, i dënuar më parë për "Drejtim mjeti pa dëshmi", L. E., 28 vjeç, dhe D. T., 22 vjeç. "Gjatë kontrollit të ushtruar në banesën e shtetasve Ardit Elezi dhe L. E., janë gjetur e sekuestruar në cilësinë e provës materiale sendet e vjedhura: Goma automjetesh me gjithë disqe, trapan, sharra, çantë me vegla pune etj., si dhe një armë zjar- ri pistoletë tip ' Bereta', 4 fishekë model 7.65, 2 maska etj.", tha Policia.
KASAFORTA E KARBURANTIT
Në vijim të veprimeve hetimore, ka rezultuar se dy prej shtetasve të shpallur në kërkim, L. E., dhe D. T., janë bashkautorë të ngjarjes së ndodhur më datë 6 nëntor 2017, në rrugën "Bulevardi Blu", në Kamzë, ku dy persona te paidentifikuar nën kërcënimin e armës kanë tentuar të vjedhin kasafortën e një karburanti. Ngjarja ka ndodhur pas mesnate, por grabitja që kishin planifikuar ka dështuar. Duke qenë se plani për të tërhequr kasafortën me para ka zgjatur më shumë se ç'e kishin parashikuar, dy të dyshuarit janë lar- guar pa realizuar grabitjen, nga frika e Policisë. Në momentin që kanë dëgjuar sirenat e një makine të Patrullës së Komisariatit nr. 5, ata kanë hipur me shpejtësi në automjetin e tyre dhe janë larguar nga vendi i ngjarjes. Rreth orës 00: 30, në sallën operative është dhënë sinjalizim nga Policia Private, që është e kontraktuar për ruajtjen e pikës së kar- burantit, se kishte rënë sinjali i alarmit dhe kishte dyshime për një grabitje të mundshme. Menjëherë pas këtij njoftimi drejt adresës së dhënë, në "Bulevardin Blu", në Kamzë, janë nisur patrullat e Komisariatit nr. 5, që ndonëse nuk kanë arritur në kohë për të arrestuar autorët, kanë mundur të parandalojnë grabitjen e kasafortës me para.