Përmbytjet, Prokuroria hetim për autostradën
Rama: Presim një situatë aspak të lehtë, sidomos në zonën poshtë. Shpresojmë që do t’i përballojmë
Përkeqësohet bilanci i përmbytjeve në ditën e dytë të reshjeve. 3300 shtëpi të zaptuara nga uji dhe dhjetëra ura të shembura. Pa energji 128 mijë familje. Zbardhet raporti i BB dhe Ministrisë së Bujqësisë: Janë 410 diga me probleme të theksuara teknike. Duhen 717 milionë USD për digat e kanalet ujitëse. Prokuroria nis hetim për dëmet në autostradën Tiranë- Durrës
Mbi 3300 banesa janë dëmtuar si pasojë e përmbytjeve të shkaktuara në 24 orët e fundit, ndërsa Forcat e Armatosura kanë ndërhyrë duke shpëtuar 266 persona të rrezikonin jetën për shkak të situatës së krijuar në reshjet e dendura.
Përveç banesave, janë dhe 191 shkolla të dëmtuara, ku numri më i madh ndodhet në qarkun e Korçës dhe Gjirokastrës. Ndonëse situata deri tani është përballuar me dëme minimale, gjatë tri ditëve të ardhshme priten përmbytje për shkak të prurjeve të mëdha të Vjosës dhe nga fakti se hidrocentralet e Komanit e të Vaut të Dejës ndodhen në pikë kritike dhe ka nisur shkarkimi tashmë. Në mbledhjen e Komitetit të Koordinimit dhe Menaxhimit të Emergjencave Civile, Kryeministri Edi Rama bëri një krahasim me situatën e krijuar dy vite më parë, duke thënë se puna për pastrimin e kanaleve e argjinaturave dhe investimet në hidrovore ka dhënë rezultat. “Të gjithë e mbajnë mend 2015- n, ku reshjet me sa duket ishin më pak se kaq dhe na kujtohen pamjet dramatike të 24 orëve të para nga zemra e qyteteve si Vlora, Durrësi dhe Tirana. Ndërkohë që me më shumë reshje, një situatë e tillë deri tani nuk është përsëritur. Një rol pozitiv kanë luajtur dhe pastrimet e bëra në dy anët e rrugëve kombëtare gjatë shtatorit dhe tetorit. Përballë këtyre situatave, shteteve më shumë të zhvilluara se Shqipëria ndodh të gjun- jëzohen më keq”, u shpreh kreu i qeverisë. Rama kërkoi nga qytetarët që të tregohen të vëmendshëm ndaj paralajmërimeve të Emergjencave Civile, Ushtrisë dhe Policisë, në mënyrë që të shmangen tragjeditë. Nga ana tjetër, kërkoi nga autoritetet të gjithë vëmendjen për lumin e Vjosës, pasi gjatë ditës së shtunë, për shkak të prurjeve të mëdha, mund të dalë nga shtrati dhe të shkaktojë përmbytje masive. “Nesër ( sot) presim një situatë aspak të lehtë, sidomos në zonën poshtë. Shpresojmë që do t’i përballojmë me maksimumin e eficencës”, u shpreh Rama.