Kryeprokurorja e re, Rama kundër Kryemadhit: Po të kishte integritet, refuzonte

Zëvendëskryetari i Lëvizjes Socialiste për Integrim, Luan Rama, ka reaguar kundër qëndrimeve të mbajtura nga kryetarja e kësaj force politike për Kryeprokuroren e re, Arta Marku. Në një qëndrim në “Facebook”, Luan Rama shpjegon se është kundër qëndrimeve të mbajtura nga Kryemadhi lidhur me Markun, duke mos e gjykuar atë vetë personalisht, por praktikën sipas së cilës u zgjodh. Rama shton se Kryeprokurorja e re, Arta Marku ka përgjegjësitë e saj pasi me vetëdije, u bë pjesë e lojës politike të Partisë Socialiste për të deformuar Reformën në Drejtësi. “Nuk jam dakord me ju zonja Kryemadhi! Që prej votimit antikushtetues në Kuvendin e Shqipërisë, kur zonja Arta Marku u caktua si prokurore zëvendësuese e Prokurorit të Përgjithshëm e në vijim, ju kam dëgjuar në të gjitha prononcimet tuaja publike të shpreheni se, “nuk jemi kundër Artës e nuk kemi gjë me të, por me praktikën antikushtetuese dhe antiligjore që u ndoq nga ana e Partisë Socialiste”. Më lejoni, zonja Kryemadhi, t’ju shpreh objeksionet e mia, përkatësisht edhe kundërshtimin tim ndaj këtij qëndrimi të shprehur nga ana juaj, pasi zonja Arta Marku, me apo pa vetëdije, u bë pjesë e lojës politike të Partisë Socialiste për të deformuar e penguar Reformën në Drejtësi dhe pranoi të zëvendësojë Prokurorin e Përgjithshëm, e mbështetur vetëm nga votat e urdhëruara të Kryeministrit dhe klanit të tij”, sqaron Rama. Sipas zëvendëskryetarit të LSI- së, një prokuror me integritet dhe një profesionist karriere nuk do të pranonte të merrte një detyrë në kundërshtim me Kushtetutën. “Një prokuror me integritet qytetar dhe profesional, një profesionist që karrierën e bazon në zotësitë profesionale dhe jo në konjukturat politike, një jurist që i falet vetëm ligjit dhe jo urdhrit politik, nuk do të pranonte të caktohej në një detyrë në kundërshtim me Kushtetutën dhe përmes një procesi krize dhe konflikti politik”, sqaron zëvendëskryetari i LSI- së.