Frika nga arrestimet, PS e LSI dakord që në mars të 2017 për imunitetin e deputetit
Dokumenti ku u bazua PS, u miratua me votat e LSI e PDIU
Ish- aleatët në qeverisjen e kaluar, Partia Socialiste dhe Lëvizja Socialiste për Integrim, kanë votuar më 30 mars të vitit 2017 ndryshimet në Kodin e Procedurës Penale, ku është prekur dhe neni 288, i cili flet për autorizimin e arrestimit të deputetëve.
Një vit më parë PS- LSI dhe PDIU kanë miratuar me 88 vota pro ndryshimet në Kodin e Procedurës Penale, ndërsa PD asokohe bojkotonte punimet e Kuvendit dhe protestonin në çadrën e ngritur para Kryeministrisë. Por si ka ndryshuar neni 288 i Kodit të Procedurës Penale? Në legjislacionin aktual, thuhet se kërkesa e prokurorëve duhet të kërkojë autorizimin e Kuvendit. Ndërkohë që në pikën dy të nenit 288, thuhet se kërkesa e prokurorit duhet të shoqërohet me një relacion të arsyetuar, të shoqëruar me provat që e mbështesin kërkesën e tij. “Kur, ndaj një deputeti duhet të caktohet masa e sigurimit të arrestit në burg ose në shtëpi, heqja e lirisë në çfarëdolloj forme, kontrolli personal ose i banesës, prokurori kërkon autorizim nga Kuvendi. Kërkesa për autorizim paraqitet kur plotësohen kushtet ligjore, të parashikuara në këtë Kod për kryerjen e veprimeve, të parashikuara në pikën 1 të këtij neni. Ajo shoqërohet me një relacion të arsyetuar, të shoqëruar me provat që mbështesin kërkesën e tij”, thekson Kodi i Procedurës Penale. Por si ka qenë ky nen në ligjin e vitit 2014 dhe si është ndryshuar ai? Në legjislacionin e ndryshuar theksohet se provat dhe argumentet ligjore, prokurori duhet t’i paraqiste në kërkesën për arrestimin e deputetit. Pra, ndryshimi që kanë bërë socialistët në legjislacion është fare i pakët, por që ndryshon komplet kontekstin dhe detyrimit ligjore që ka prokurori karshi Kuvendit. “Kërkesa për autorizim shoqërohet me një relacion, ku prokurori parashtron provat dhe argumentet ligjore për kërkesën e paraqitur”, thuhet ne nenin e Kodit të Procedurës Penale të vitit 2014, i cili u ndryshua një vit më parë.
RREGULLORJA Këtë ndryshim të Kodit të Procedurës Penale, socialistët e kanë propozuar të pasqyrohet në rregulloren e Kuvendit, konkretisht në nenin 118 ku flitet për “autorizimin për procedimin” e një deputeti apo një ministri. Por procedurat ekstra ligjore në propozimin e PS- së për në rregulloren e Kuvendit, fillojnë me kompetencat që marrin deputetët që janë anëtarë të Këshillit të Mandateve dhe Imuniteteve. Deputetëve u lind e drejta që të marrin në pyetje prokurorët, të cilët kërkojnë arrestimin e një deputeti. Ndërkohë që kjo e drejtë që të marrë në pyetje prokurorin i lind dhe deputetit, për të cilin kërkohet arrestimin. Pra, procedura që u ndoq për rastin e Saimir Tahirit, kur ky i fundit i kërkoi llogari prokurorëve që kërkuan arrestimin e tij. “Në mbledhjen e Këshillit për Rregulloren. Mandatet dhe Imunitetin merr fjalën prokurori, i cili paraqet arsyet e kërkesës drejtuar Kuvendit. Pas paraqitjes së kërkesës, çdo anëtar i Këshillit ka të drejtë t’i drejtojë pyetje prokurorit. Shqyrtimi i çështjes në Këshill, kryhet nëpërmjet një procedure që i garanton deputetit, ndaj të cilit kërkohet autorizimi për procedim, të drejtën për t’u informuar në kohë, për t’u pyetur, për t’u dëgjuar, dhe për të bërë pyetje ndaj kërkuesve të autorizimit si dhe për të paraqitur shpjegimet e tij”, thuhet në propozimin e ri të PS- së për rregulloren e Kuvendit.