Deklarata për gjuhën shqipe në Maqedoni, Moska sulmon Edi Ramën
Lavrov: Konfirmoi platformën e urryer të Tiranës, rrezik ndëretnik
Ministria e Jashtme ruse ka dënuar deklaratën e Kryeministrit Rama, në lidhje me kontributin e qeverisë shqiptare për miratimin e gjuhës shqipe si gjuhë zyrtare me ligj.
Përmes një deklarate në faqen zyrtare në “Facebook”, Ministria e Jashtme Ruse e cilësoi deklaratën e Kryeministrit Rama si “platformën e urryer të Tiranës”, e cila sipas saj përbën dhe rrezik ndëretnik në rajon. “Ne u kushtuam vëmendje deklaratave të Kryeministrit të Shqipërisë, Edi Rama, më 14 janar, lidhur me përfshirjen në formimin e Ushtrisë Çlirimtare të Kosovës dhe “betejën për Kosovën” si dhe kontributin vendimtar të PS- së në procesin e futjes në Kuvendin e Republikës së Maqedonisë të Ligjit “Për përdorimin e gjuhëve”, sipas të cilit, gjuha shqipe në të vërtetë merr statusin e një gjuhë shtetërore. Kjo retorikë e Ramës konfirmon qëllimin për të promovuar më tej “platformën e urryer të Tiranës”, të hartuar me pjesëmarrjen e tij personale”, thuhet në deklaratën e Ministrisë së Jashtme Ruse. Gjatë një takimi me të rinjtë e forumit rinor eurosocialist, Kryeministri Rama bëri pohimin e fortë, kur tha se ishte falë qeverisë së tij që u miratua në Maqedoni ligji për Gjuhën Shqipe. “PSja nuk e ka tradhtuar, cenuar apo lëkundur për interesin kombëtar të Shqipërisë dhe shqiptarëve. Është kjo parti, që nuk u lëkund për asnjë moment, kur u shfaq UÇK- ja dhe kur u zhvillua beteja për Kosovën. Është kjo parti, që nuk do të lëvizë nga interesi kombëtar nga të gjitha marrëdhëniet me fqinjët. Nëse përpara pak ditësh, në parlamentin e Maqedonisë, kaloi një ligj që as nuk mund të imagjinohej, deri vetëm pak kohë më parë, unë po ju them sot me krenari, që duhet të jeni të gjithë krenar, duhet të jenë krenarë të gjithë ata që e kanë votuar, e kanë mbështetur dhe e kanë besuar këtë parti, sepse pa këtë parti në udhëheqjen e vendit, nuk do të kishte sot Gjuhë Shqipe të zyrtarizuar me ligj në Maqedoni”,- tha Kryeministri Rama. Sipas Ministrisë së Jashtme Ruse, këto deklarata cenojnë kushtetutën e Maqedonisë dhe të marrëveshjeve dypalëshe mes Shqipërisë dhe Maqedonisë. “Zbatimi i dispozitave të këtij dokumenti është i mbushur me erozionin e themeleve kushtetuese të shtetësisë maqedonase, Marrëveshjes Kornizë të Ohrit dhe si rezultat – goditjet e reja ndëretnike në Ballkan. E gjithë kjo është në përputhje me ambiciet e mëdha shqiptare që venë në pikëpyetje integritetin territorial të një numri vendesh në rajon”,- thuhet në deklaratën e Ministrisë së Jashtme Ruse. Moska zyrtare, duke dhënë qëndrimin e saj për ligjin e aprovuar në parlamentin maqedonas, shprehet se një ligj i tillë duhet të marrë konsensusin edhe të presidentit të Maqedonisë. “Duke i kushtuar rëndësi të madhe çështjes së përdorimit të gjuhëve, ne e konsiderojmë thelbësisht të rëndësishme që vendime të tilla, të bëhen në bazë të marrëveshjes së të gjitha degëve të pushtetit dhe konsensusit të gjerë në shoqëri”,- përfundon deklarata e Ministrisë së Jashtme Ruse si reagim ndaj qëndrimit të Kryeministrit Rama për rolin e qeverisë së tij në zyrtarizimin e gjuhës shqipe si gjuhë zyrtare në Maqedoni.