Kodet me klientët, kapet taksisti i kokainës
Zbardhen kodet me klientët për shpërndarjen e drogës
Një taksist 38- vjeçar është vënë në pranga nga Antidroga e Tiranës, pasi dyshohet se shpërndante lëndë narkotike të llojit kokainë, të cilën e fshihte në automjetin e tij. Personi i arrestuar shfrytëzonte profesionin e tij si taksist për shpërndarjen e lëndës narkotike, por u kap në flagrancë tek rrethrrotullimi pranë një qendre tregtare, disa metra pasi kalon Saukun.
Në momentin e ndalimit nga oficerët e Policisë, gjatë operacionit “Taksisti”, 38vjeçari Klaudian Sina ishte duke transportuar 4 pasagjerë me automjetin e tij. Gjatë kontrollit, Policia gjeti dhe sekuestroi 25 doza kokainë, të cilat i kishte bërë gati për shitje. Policia tha se Sina po mbahej nën vëzhgim me metoda speciale nga Antidroga prej disa javësh. Automjetin e tij taksi, ai e përdorte edhe për transportin e pasagjerëve që kërkonin shërbimin e tij, por njëkohësisht edhe për shpërndarjen e drogës. Burimet thanë se ai punonte me klientelë të përzgjedhur, të cilët i telefononin sa herë që kishin porosi për lëndë narkotike. Ndërsa, për të përcaktuar sasinë e dozave që kërkonin, klientët përdornin kode me numra pasagjerësh. Policia tha se taksisti i arrestuar shpërndante lëndë narkotike kryesisht në lokalet e natës, gjatë fundjavës, por edhe sipas porosive të klientëve në zona të ndryshme të Tiranës.
OPERACIONI Policia tha dje se, Antidro- ga kishte nisur hetimet, në bazë të informacioneve të marra në rrugë operative se shtetasi Klaudian Sina, me mjetin tip “Ford Focus” me targa AA 782 EA, shpërndante lëndë narkotike të llojit kokainë. Pas verifikimeve të informacioneve, menjëherë është organizuar puna për kapjen në flagrancë të këtij shtetasi, ku në afërsi të rrethrrotullimit pranë një qendre tregtare te Rruga e Elbasanit, specialistët për Hetimin e Narkotikëve kanë ndërhyrë dhe kanë bllokuar automjetin. Në drejtim të makinës ishte shtetasi Klaudian Sina, si dhe katër pasagjerë, të cilët e kishin marrë si taksi. Gjatë kontrollit të automjetit, në sedil- jen e pasme, mbrapa pasagjerit të parë, në ndarjen midis sediljes ulëse dhe asaj mbështetëse janë gjetur dhe sekuestruar në cilësinë e provës materiale 15 paketime plastike të mbyllura me djegie. Brenda këtyre paketimeve kishte lëndë të dyshuar narkotike, të llojit kokainë, si dhe një facoletë brenda së cilës kishte 10 paketime plastike të mbyllura me djegie ku kishte material pluhur të dyshuar kokainë. Gjithashtu janë sekuestruar në cilësinë e provës materiale makina e 38- vjeçarit Sina, si dhe dy celularë. “Materialet proceduriale do t’i kalojnë Prokurorisë pranë Gjykatës së Shkallës së Parë Tiranë, për veprime të mëtejshme hetimore për veprën penale ‘ Prodhimi dhe shitja e narkotikëve’, të parashikuara nga neni 283 i Kodit Penal”, tha dje zyrtarisht Policia e Tiranës.
DROGA NË LAÇ Policia e Lezhës ka arrestuar një 25- vjeçar, si shpërndarës kokaine në qytetin e Laçit. I arrestuari është Alfons Lleshaj, i cili u kap gjatë kontrollit të ushtruar në ambientet e një lokali në Fushë- Milot. Policia tha se të riut i janë gjetur 11 doza kokaine që do i shiste në disa lokale. Gjithashtu, gjatë kontrollit të lokalit që ishte në pronësi të shtetasit me iniciale K. L., 25 vjeç, janë gjetur edhe 12 kompjuterë për lojëra fati, një tavolinë pokeri, si dhe një tavolinë “Black Jack”, të cilat ky shtetas i mbante në kundërshtim me dispozitat ligjore. Policia tha se, u sekuestruan në cilësinë e provës materiale lënda narkotike, kompjuterët e lojërave të fatit dhe 2 tavolinat e pokerit.