Balla: Spaho dakord për ndryshimin e rregullores

Deputeti i PD: Gënjeshtër, s’mund të shkelim Kushtetutën

Kryetari i Grupit Parlamentar të Partisë Socialiste, Taulant Balla, tha dje se propozimet për ndryshimin e rregullores së Kuvendit, reflektojnë ndryshimet kushtetuese, të cilat i ka votuar edhe Partia Demokratike e drejtuar nga Lulzim Basha. Sipas tij, projektvendimi ka për qëllim që të sjellë rregulloren e Kuvendit në të njëjtën linjë me Kushtetutën. “Ka qenë një kërkesë e hershme në rastet kur Kuvendi është gjetur në situatën, se cilën prej akteve të respektonte: Kushtetutën apo rregulloren dhe është respektuar Kushtetuta. Para pak muajsh, në rastin e shqyrtimit në Këshillin e Mandatave të kërkesës së Prokurorisë në rastin e deputetit Saimir Tahiri: nëse Këshilli i Mandateve do t’i ishte referuar Rregullores, do të kishte qenë një gabim dhe i është referuar Kushtetutës. Të gjendur para kësaj situate, është bërë një përmbledhje tërësore e të gjitha ndryshimeve kushtetuese, e të gjitha vendimeve të Gjykatës Kushtetuese, edhe të ndryshimeve në Kodin e Procedurës Penale me qëllim që institucionet e Kuvendit, Këshilli i Mandateve dhe i Rregullores, Këshilli i Legjislacionit, madje dhe çështje që lidhen me rendin e ditës së Kuvendit, të rregullohen me qëllim që detyrimi ynë për ta pasur Rregulloren e Kuvendit, në reflektim të plotë dhe me transpozim të plotë të ndryshimeve kushtetuese në librin e rregullave të Kuvendit të jetë vijuese”,- deklaroi Balla. Ai shtoi se për nevojën e ndryshimeve e ka diskutuar edhe me kryetarin e grupit të PD- së, Spaho. “Nevojën për një rishikim të rregullores e kam ndarë me kolegun Spaho prej disa muajsh për ta ndryshuar në disa dimensione. Duhet të ketë më shumë kohë që deputetët t’u kushtojë zgjedhësve. Kemi komisione që funksionojnë deri të premten dhe koha për të komunikuar me zgjedhësit është në disfavorin e rregullores aktuale. E mirëkuptoj Bashën, është deputet i ri, nuk e njeh rregulloren”,- deklaroi ai. Kryetari i Grupit Parlamentar demokrat, Edmond Spaho, përmes një reagimi në “Facebook”, tha se nuk ka pasur asnjë dakordësi me PSnë për rregulloren, sepse nuk mund të shkelte Kushtetutën. “Po lexoj në lajme që Taulant Balla paska thënë që për ndryshimin e Rregullores se Kuvendit, ku kërkohet që për arrestimin e deputeteve Prokuroria të paraqesë edhe provat që disponon, paska marrë edhe miratimin e Partisë Demokratike.

Kjo është gënjeshtër, fund e krye. Partia Demokratike nuk ka bashkëpunuar, negociuar apo rënë dakord për ketë çështje me Partinë Socialiste dhe nuk do ta bëjë këtë gjë, as në të ardhmen , sepse ne nuk mund te pranojmë të shkelim Kushtetutën e vendit.

Ky ndryshim është ide e Edi Rames, që synon të mbrojë veten, hajdutët e tij në qeveri dhe kriminelët që mban pas nga drejtësia dhe zemërimi qytetar”,- shkruan kreu i grupit demokrat.