Meta: Partitë t’i kthehen dialogut politik
“Në 6 muajt e ardhshëm, të çelim negociatat me BE”
Presidenti Meta, në prag të çeljes së negociatave me Bashkimin Europian, u bëri thirrje partive politike që të heqin dorë nga fryma konfliktuale dhe t’i kthehen dialogut politik. Gjatë pritjes vjetore me trupin diplomatik, kreu i shtetit tha se “Shqipëria ndodhet në një moment kyç të rrugëtimit të saj europian”. Ne kemi pritmërinë legjitime që në 6- muajt e ardhshëm, të çelim negociatat e anëtarësimit me Bashkimin Europian. Çelja e negociatave, gjatë Presidencës bullgare, na kërkon shumëfishimin e përpjekjeve të përbashkëta për të garantuar sigurinë në rrugën e përbashkët europiane të vendit. Ndaj, konfliktet dhe fryma përjashtuese, duhet t’i lenë vendin bashkëpunim- it dhe dialogut politik për të arritur rezultate më të prekshme e të besueshme për reformat e kërkuara e sidomos në 5 prioritetet kyçe, duke nisur me Reformën në Drejtësi dhe luftën kundër krimit të organizuar, korrupsionit, të drejtat e pronës, reforma e drejtë në administratën publike dhe respektimi i të drejtave të njeriut”,- tha Presidenti i Republikës. Reforma në Drejtësi dhe ngritja e institucioneve të reja, për kreun e shtetit, janë pritshmëritë e mëdha të qytetarëve shqiptarë, ndërsa e cilësoi me rëndësi të veçantë pavarësinë e institucioneve të reja. “Qytetarët tanë, së pari, por edhe gjithë partnerët, presin ngritjen e institucioneve të reja të drejtësisë në respekt të ndryshimeve kushtetuese të re- alizuara me konsensus. Ndaj, zbatimi i reformës në mënyrë transparente, të përgjegjshme e të paanshme kërkon dialog dhe bashkëpunim të qëndrueshëm e të sinqertë për të garantuar pavarësinë, besueshmërinë dhe qëndrueshmërinë e institucioneve të reja të drejtësisë. Niveli i pavarësisë së institucioneve, mbetet barometri më i saktë i standardit të demokracisë dhe shtetit të së drejtës”,- tha kreu i shtetit. Ai vlerësoi rolin e partnerëve të Shqipërisë, veçanërisht të SHBA- ve për suksesin e reformave në vend. “Viti 2018 shënon 100- vjetorin e përfundimit të Luftës së Parë botërore dhe në mbarë botën do të flitet për mësimet që na jep historia. Për shqiptarët, ky përvjetor rifreskon rolin vendimtar të Presidentit amerikan Uillson, për mbijetesën e shtetit shqiptar. Me këtë rast, dua të rikonfirmoj mirënjohjen e thellë për miqësinë e fortë që SHBA- të i kanë ofruar Shqipërisë dhe shqiptarëve për më shumë se një shekull. Falë kësaj mbështetjeje të vyer, jam i bindur se Shqipëria do të ecë përpara në rrugën e reformave, në luftën kundër krimit të organizuar, trafikut të drogës e kontrollit të kufijve, sfida që lidhen ngushtë me sigurinë tonë kombëtare dhe të rajonit”,- tha Presidenti i Republikës.