Do përdorej për trafik droge, zbulohet skafi i braktisur në Vlorë

VLORE – Policia e Vlorës ka sekuestruar dje një skaf që në bregdetin e Radhimës, ndërsa ka nisur hetimet për identifikimin e pronarëve. Burimet thanë, se ka dyshime se mjeti lundrues do të përdorej për trafikim të lëndëve narkotike, por moti i keq u ka prishur planet trafikantëve. Për këtë arsye, ata kanë braktisur në Radhimë gomonen me gjatësi 9 metra, që u sekuestrua nga Policia. Gjatë orëve të para të së enjtes, shërbimet e Policisë Kufitare së bashku me Delta Forcën, gjatë patrullimit të kontrollit të territorit, kanë konstatuar në vendin e quajtur Radhimë, në breg të detit, gomonen me dy motorë. Ndërsa kanë pikasur mjetin lundrues, uniformat blu kanë këqyrur në brendësi të saj, por nuk është gjetur asnjë lëndë e dyshimtë. Dyshimet e Policisë janë se me mjetin lundrues mund të jetë tentuar të përdoret për trafik të lëndëve narkotike. Grupi hetimor po punon për të identifikuar personin apo personat që kanë në pronësi mjetin lundrues, por deri më tani nuk është arritur të identifikohet se kujt i përket gomonia. “Nga verifikimi paraprak, dyshohet se mjeti mund të jetë braktisur dhe se në brendësi të tij nuk është gjetur asnjë send i kundërligjshëm. Po vijojnë verifikimet për dokumentimin e plotë ligjor dhe identifikimin e pronësisë së këtij mjeti”, bëhet e ditur nga Policia. Ndërkohë, burime nga Policia, kanë konfirmuar për “Panorama” se nga këta të fundit është bërë edhe këqyrja e vendit përreth zonës ku u gjet mjeti lundrues për të parë nëse ka pasur tentativë trafiku dhe nëse gjendej sasi të lëndëve narkotike. Nga verifikimet e para, grupi hetimor që po punon për zbardhjen dhe dokumentimin e plotë të ngjarjes, ka ngritur dyshime se, tentativa për të trafikuar lëndë narkotike ka dështuar për shkak të motit të keq ose nga shfaqja e ndonjë avarie në mjetin lundrues. Kjo ka bërë që trafikantët më pas të braktisin gomonen në zonën e Radhimës. Gjithsesi, Policia vijon hetimet për të identifikuar pronarin e mjetit lundrues, çka do të hedhë më shumë dritë rreth ngjarjes.