Përplasja Koni- Kule, rektorit i përgjigjet bordi
Në një intervistë të gjatë dhënë për gazetën, Mynyr Koni thotë se përplasja e brendshme në Universitetin e Tiranës ka vetëm një fajtor, Dhori Kulen. Sipas tij, dekani i Ekonomikut i mbështetur nga tre dekanë të tjerë, që dikur i ka pasur në stafin e rektoratit të UT- së, si dhe nga Bordi i Administrimit dhe administratori kanë krijuar një klan me qëllime të errëta. Synimet e tyre për të përfituar sa më shumë fonde nga kontratat apo nga tarifat e studentëve, sipas Konit, duan t’i arrijnë duke shkelur mbi kompetencat e tij si rektor. “Për mendimin tim, ai është një grup i strukturuar në UT, i cili si gjatë kohës që ka drejtuar dhe tashmë me mbështetjen e institucioneve të tjera, kërkon në mënyrë të vazh- dueshme të influencojë për të thithur fondet nëpërmjet kontratave të ndryshme apo të ardhurave që krijohen nga tarifat e studentëve. Në bord, ndonëse një pjesë janë emëruar nga universiteti dhe një pjesë nga ministrja, ata janë një grup unison. Në këto kushte, për gjykimin tim, kjo përbërje e Bordit të Administrimit është totalisht një thyerje e autonomisë.” Në qendër të akuzave për prishjen e universitetit, rektori vë ish- mikun e tij të ngushtë, paraardhësin e tij në detyrë, Dhori Kulen. “Kule kërkon që ku të jetë ai, të jetë dhe pozicioni. I bie që sipas gjykimit të tij, rektori të jetë tashmë te Fakulteti Ekonomik. Ai më ka mbështetur në procesin zgjedhor, është një fakt që s’e mohoj kurrë, por tashmë duket e qartë arsyeja përse më paska mbështetur.” Në intervistën e një dite më parë për gazetën, Koni jep prova të forta të lidhjes së dekanëve me administratorin dhe Bordin e Administrimit, ndërsa akuzon këta të fundit për shkelje të rënda ligjore përgjatë më shumë se një viti në drejtimin e universitetit.