Meta letër Bushatit, pezull plotfuqishmëria
Kërkesa për emrat e negociatorëve para negociatave për detin
Ministri i Jashtëm, Ditmir Bushati, është njohur me letrën që Presidenti i Republikës, Ilir Meta dërgoi mëngjesin e së hënës për çështjen e plotfuqishmërisë për negociatat me Greqinë. “Panorama” njoftoi se kreu i shtetit vendosi që t’i përgjigjet me një shkresë kërkesës së Bushatit për dhënien e autorizimit për grupin negociator, që do të zhvillojë negociata me Greqinë. Në këtë shkresë, Meta ka kërkuar përmirësimin e disa problematikave të konstatuara në letrën për dhënien e autorizimit për grupin negociator, në mënyrë që Presidenti të dalë me një vendimmarrje.
Për shkresën që i drejtoi Ministrisë së Jashtme, Meta vuri në dijeni edhe Kryeministri Edi Rama dhe kreun e Kuvendit, Gramoz Ruçi. Sipas burimeve, Meta i ka kërkuar Bushatit që të saktësojë emrat e negociatorëve, që do të negociojnë për marrëveshjen e re me Greqinë. Kujtojmë se në shkresën e dërguar më 12 shkurt në Presidencë, ministri i Jashtëm, Ditmir Bushati, ka informuar Metën lidhur me ecurinë e negociatave me palën greke dhe nevojën e dhënies së plotfuqishmërisë për një grup negociator të qeverisë, për të konkretizuar marrëveshjen. Në të njëjtën kërkesë, Bushati informonte Presidentin se pjesë e grupit negociator do të ishin përfaqësues të Ministrisë së Jashtme, Ministrisë së Brendshme, Ministrisë së Mbrojtjes dhe Ministrisë së Ekonomisë dhe Financave, por pa saktësuar emrat që qeveria do t’i besojë marrëveshjen me palën greke. Një tjetër kërkesë që kreu i shtetit i ka shprehur në shkresën e tij të shoqëruar me mbishkrimin “Sekret Shtetëror” ministrit Bushati, ishte edhe transparenca e negociatave. Konsultimet e zhvilluara me paraardhësit e tij e kanë shtyrë Presidentin e Republikës që në shkresën, t’i kërkojë kreut të diplomacisë, Ditmir Bushati, transparencë për të gjithë negociatat që janë zhvilluar dhe do të zhvillohen me palën greke. Presidenti ka kërkuar nga Bushati të dijë mbi parimet e negocimit me palën greke, kryesisht për marrëveshjen e ‘ Detit’ dhe “Ligjit të Luftës”. Burimet nga Presidenca, saktësojnë se në të gjithë takimet konsultuese që Meta zhvilloi me paraardhësit e tij, Nishani, Topi, Moisiu, Mejdani dhe Berisha, iu kërkua që qeveria të bëjë transparente negociatat me palën greke.