Basha flet për “holokaust”: Rama po spastron shqiptarët
“Metodë genocidiale, ndërhyrja emergjencë kombëtare”
Partia Demokratike do të zhvillojë një mocion me debat me Kryeministrin Edi Rama, lidhur me heqjen nga skema ekonomike të mijëra familjeve në të gjithë vendin.
Kërkesa pritet të depozitohet gjatë ditës së sotme në Kuvend, ndërkohë që përgjatë gjithë mbledhjes së Grupit Parlamentar Demokrat që u zhvillua mesditën e së hënës, ky ishte diskutimi kryesor i shumë prej deputetëve të PD. Në një deklaratë për media, kreu i Partisë Demokratike, Lulzim Basha, e cilësoi holokaust dhe metoda naziste nga Kryeministri nxjerrjen nga skema e ndihmës ekonomike të familjeve shqiptare. Basha theksoi se për shkak të vullnetit të Edi Ramës, sot Shqipëria është i vetmi vend në Europë, që ka futur në karantinë urie apo ka çuar drejt emigracionit shumë qytetarë për shkak të varfërisë, që nuk kanë mundësi të sigurojnë ushqimin e përditshëm, ilaçet, energji elektrike apo ngrohje për shtëpitë e tyre. “Dhjetëra dhe mijëra familje janë hequr nga listat e ndihmës ekonomike. Bëhet fjalë për familje që ndodhen në pikën më të ulët të mbijetesës. Prindër të papunë, fëmijë që ndodhen në gjendje të mjerueshme për bukën e gojës dhe në gjendje të keqe shëndetësore. Në mënyrë të pashpjegueshme dhe në mënyrë kriminale janë hequr nga listat e ndihmës ekonomike, e vetmja e ardhur me të cilën mbajnë shpirtin gjallë. Kjo është një dramë njerëzore, por është edhe një emergjencë kombëtare. Jemi vendi i vetëm në Europë sot, që ka futur në karantinë urie dhe ka çuar drejt zhdukjes me vullnetin e vetëm të Edi Ramës dhe marionetës së tij në krye të Ministrisë së Shëndetësisë, një pjesë të madhe të popullsisë, të cilët sot nuk kanë ushqimin dhe paratë për të mbajtur shpirtin gjallë. Kemi një qeveri dhe një Kryeministër që po përdor metoda naziste. Po përdor një metodë genocidiale apo spastrimi ndaj shqiptarëve dhe popullsisë së vet. Ne po punojmë për të evidentuar përmasat e këtij ‘ holokausti’ të Edi Ramës”, deklaroi Basha. Kreu i PD tha se këto janë metoda spastrimi që Kryeministri po i përdor ndaj qyteta- rëve të vet dhe u bëri thirrje mediave ta vendosin sa të munden në qendër të vëmendjes së tyre përjashtimin nga skema e ndihmës ekonomike të mijëra familjeve ekstremisht të varfra. “Nuk ka gjë më urgjente: jetë njerëzore në rrezik. Edi Rama u ka lënë vetëm një mundësi- të shuhen, të vdesin ose të largohen, që do të përbëjë një tjetër valë refugjatësh që do të mbulojë Europën”, tha Basha.