Komisioni hetimor për Tahirin, shtyhet miratimi
Balla: Vendimi i PD ka 3 komisione hetimore, duhet ndryshuar
Maxhoranca ka shtyrë dje miratimin e kërkesës së Partisë Demokratike për të ngritur një komision hetimor për çështjen "Tahiri". Konferenca e Kryetarëve nuk ka miratuar dje vendimin e opozitës për shkak se maxhoranca ka konstatuar se kërkesa e Grupit të Partisë Demokratike është në tejkalim të vendimit të Gjykatës Kushtetuese. Për kryetarin e Grupit të PS- së Taulant Balla, kërkesa e PDsë ka brenda ngritjen e tre komisioneve hetimore. Me këtë justifikim, Partia Socialiste i ka kërkuar opozitës që të riformulojë kërkesën për komision hetimor dhe ta përqëndrojë në një të vetëm. "Ne jua thamë qartë edhe në Konferencën e Kryetarëve, kërkesa e tyre në vendim ka tre komisione hetimore, jo një. Ne jemi të gatshëm t'ju mbështesim të ngrini dhe tre komisione hetimore nëse doni, por dëshira jonë ishte që këto tre komisione hetimore të kërkuara nga ata në projektvendim, të përmblidhen në një komision hetimor për të kursyer edhe shpenzimet e Kuvendit, për të mos pasur tre Komisione Hetimore, por për të pasur një komision hetimor, arsyet e ngritjes së të cilit dihen. Në mungesë të një kauzë politike për momentin nga ana e Partisë Demokratike dhe opozitës në tërësi, mundohet që të instrumentalizohet një çështje të tillë", tha dje Balla. Por për Edmond Spahon, kreun e Grupit të PD- së, Partia Socialiste po zvarriste qëllimisht miratimin e komisionit hetimor në mënyrë që të prishte provat dhe larguar dëshmitarët kyç për çështjen ' Tahiri'. "Mungesa e vendimit është zvarritje e qëllimshme e çështjes për të eliminuar provat, të largojë dëshmitarët, si në rastin e Nezar Seitit dhe të bëjë gjithçka që kjo çështje të mbyllet. Kontestimet e PS ishin ato shabllon, duke pre- tenduar se objekti i hetimit është i gjerë, që ka hapësirë për të ngritur 2- 3 komisione hetimore, por PS nuk solli asnjë argument që kërkesa ishte antikushtetuese", tha dje Spaho. Më herët, Taulant Balla deklaroi se "Ajo që i kemi thënë shumë qartë, është se brenda afatit që na jep ligji për komisionin hetimor, brenda 2 javëshit, vendimin për ngritjen e komisionit hetimor ta sjellim në binar kushtetues, sipas parimeve të përcaktuara nga vendimet e Gjykatës Kushtetuese". Nga ana tjetër, nënkryetari i Kuvendit, Edi Paloka, u shpreh i habitur për faktin se maxhoranca kërkon të ndryshojë objektin e hetimit të opozitës. "Ka edhe një vendim të Gjykatës Kushtetuese që nuk pengohet hetimi parlamentar edhe kur ka një hetim nga Prokuroria. Mbledhja sot është përsëritje e çdo here që opozita kërkon komisioni hetimor, ata kërkojnë që të na ndryshojnë objektin e hetimit. Rregullorja u jep kohë deri në dy javë", tha dje Paloka.