Emigranti 22- vjeçar i jep fund jetës me plumb në zemër

Markiled Çipi erdhi 2 ditë më parë nga Italia, dyshohen borxhet, papunësia ose ndonjë lidhje

Jetonte prej kohësh në Itali, vetëvritet dy ditë para largimit nga Shqipëria, 22- vjeçari.

Markiled Çipi qëlloi veten me plumb në zemër për motive të paqarta. Ngjarja ka ndodhur mbrëmjen e së dielës në fshatin Gramëz të Krujë, ndërsa Policia ka nisur hetimet për zbardhjen e motivit për aktin fatal që ndërmori i riu, duke përjashtuar kategorikisht pistën e vrasjes. I riu Markiled Çipi ishte kthyer nga Italia vetëm dy ditë më parë dhe do kthehej sërish pas dy ditësh në vendin ku jetonte prej vitesh. Nga informacionet e para, Policia bën me dije se 22- vjeçari është gjetur nga të afërmit brenda makinës, në garazh. “Markiled Çipi ka qëlluar veten me armë zjarri pistoletë, të cilën e mbante pa leje. Për të kryer aktin ekstrem, ai kishte zgjedhur garazhin e makinës që ndodhej pas shtëpisë së familjes Çipi dhe është gjetur i vrarë brenda në automjetin e tij dhe konkretisht në sediljen e shoferit. Ai është vetëqëlluar me një plumb tek, ku tytën e armës e kishte mbështetur në zemër. Goditja ka rezultuar fatale, duke i marrë jetën menjëherë. Familjarët nuk kanë dëgjuar armën, pasi fakti që kishte mbështetur qytën e armës në trup, zhurma është izoluar. Por, pak minuta më vonë, familjarët kanë konstatuar trupin e tij të pajetë brenda makinës së tij tip “Fiat”. Ne po zhvillojmë hetime, për të zbardhur motivin e vetëvrasjes, pasi rrëzojmë kategorikisht pistën e vrasjes”, thanë burime nga grupi hetimor për gazetën. Trupi i pajetë i të riut është dërguar për ekspertizë në Tiranë. “Duke qenë se 22vjeçari jetonte prej kohësh në Itali, kemi shumë pak informacione rreth tij. Megjithatë, ne kemi ngritur disa pista hetimi, të cilat do t’i verifikojmë me kujdes për të mësuar se çfarë e ka shtyrë të riun drejt këtij akti ekstrem. Dyshimet janë nga më të ndryshmet, që nga ndonjë borxh i mundshëm, ndonjë zhgënjim prej ndonjë lidhje dashurie, deri te fakti që vuante nevojën për t’u punësuar. Në telefonin celular nuk kemi gjetur ndonjë gjë komprometuese që mund të na ndihmonte për të zbardhur ngjarjen”, bëjnë të ditur hetuesit e angazhuar për zbardhjen e kësaj ngjarjeje. Burimet thanë se 22- vjeçari njihej si person shumë pozitiv në zonë dhe nuk kishte pasur kurrë probleme me drejtësinë. Policia ka marrë në pyetje familjarët e të riut, por këta të fundit kanë deklaruar se nuk kanë dijeni se çfarë mund ta ketë shtyrë djalin e tyre drejt vetëvrasjes. Sipas të afërmve, ai kishte ardhur dy ditë më parë nga Italia dhe do të nisej sërish drejt vendit fqinj, vetëm pas dy ditësh. Ata kanë pohuar për Policinë se nuk kishin pikasur ndonjë shqetësim te djali i tyre dhe nuk gjejnë asnjë motiv për vetëvrasjen e tij. Me anë të një njoftimi për shtyp, Policia e Durrësit sqaroi se, ngjarja ka ndodhur “rreth orës 20: 20, në fshatin Gramëz, Krujë, prapa banesës së tij, ( në garazh) në automjetin tip ‘ Fiat’ është gjetur i vetëvrarë me armë zjarri pistoletë, shtetasi M. Ç. 22 vjeç, banues në Gramëz, Krujë. Në cilësinë e provës materiale u sekuestrua arma e zjarrit tip pistoletë model 54, të cilën e mbante pa leje. Grupi hetimor po punon për zbardhjen e motiveve të ngjarjes. Materialet i kaluan Prokurorisë së Rrethit Gjyqësor Krujë për veprime Krujë për veprime të mëtejshme”.