Të burgosurit ordinerë, në mbrojtje të figurës së diktatorit në 1991
Studiuesi Kastriot Dervishi ka publikuar një telegram të të burgosurve ordinerë të Tërnovës, të cilët shprehen të gatshëm për të mbrojtur figurën e Enver Hoxhës. “Reparti nr. 312 Tërnovë ishte një kamp i punës së detyruar, i çelur për të nxjerrë mineralin e kromit dhe funksionoi si i tillë në vitet 1987- 1991. Ai u ndërtua nga të dënuarit politikë. Vuanin dënimin këtu fillimisht të dënuar politikë dhe ordinerë, por muajt e fundit të ekzistencës së tij, reparti u mbizotërua nga të dënuarit ordinerë. Në valën e madhe të telegrameve nga kontingjenti “njeri i ri”, që i drejtoheshin Ramiz Alisë në shkurt 1991 për të mbrojtur emrin e Enver Hoxhës dhe kundërshtuar kërkesat e studentëve, ishin edhe të dënuarit ordinerë të Tërnovës”, shkruan Dervishi duke postuar përmbajtjen e një telegrami. “Na e thotë mendja e na e ndien zemra se nëse populli lëviz, maja e Tërnovës nga vendi lëviz dhe populli nga vepra e Enver Hoxhës. Nëse disa e kuptojnë se gjithë këto ndryshime që po ndodhin janë pasojë e Enver Hoxhës, me plot gojën u themi se qenkan miopë e kaluar miopëve. Ndaj, u bëjmë thirrje e po u rikujtojmë se Enver Hoxha është ende gjallë e s’ka për të vdekur kurrë, derisa të shuhet çdo pëllëmbë e kësaj toke. Populli i ka njohur gjithmonë bijtë e tyre, siç njeh nëna birin e saj e Enver Hoxha është biri i nënës më të madhe, biri i luftës, i lirisë, pavarësisë e sovranitetit. E nëse diçka nuk ka vajtur mirë, shkaku kryesor ka qenë se disa nga ne apo të tjerë nuk punuan mirë. Ndaj, ne nuk po shlyejmë borxhet e ndokujt, por borxhet tona. Nëse do të kërkomë të vijë Europa në Shqipëri ose të shkojmë drejt saj, kjo udhë do mund, do djersë, do më së pari sakrificë. E të gjitha këto nuk arrihen me bojkotime, greva, shkrehje të punës, duke thyer xhama, me mitingje pa bukë e me përçarje”, shkruhet në një nga telegramet dërguar Ramiz Alisë.