Bamir Topi: Jam kundër teatrit brenda kullave
Ish- Presidenti i Republikës, Bamir Topi, është kundër ndërtimit të një Teatri Kombëtar brenda kullave private. Sipas tij, duhen ruajtur godinat që kanë vlera historike. "Kam një opinion të palëkundur dhe të painfluencuar. Sigurisht, që historia është shumë e rëndësishme. Por këndvështrimi im është se duhen ruajtur godinat, që kanë vlera historike dhe arkitekturore e funksionale. Duke e parë nga pikëpamja e pronësisë së institucionit, unë do të isha kategorikisht kundër që pronësia e këtij institucioni të ngatërrohej me interesa të tjera, që do të thotë se s'mund të ndërtohet një teatër brenda një kulle. Jo, kjo është një pronësi e shenjtë e artistëve, të cilët e bëjnë jetën e tyre brenda institucionit të teatrit", tha Topi për gazetën "Panorama". Sipas tij, mungesa e informacionit ka nxitur debatin mes artistëve dhe ministrisë. "Mendoj, se në të gjithë atë vend aty duhet të bëhet një ambient, që të jetë epiqendra e interesit artistik e kulturor e që lidhet me teatrin. Teatri ka nevojë për një godinë dinjitoze. Por edhe këtu, debati bëhet për shkak të mungesës së informacionit dhe transparencës. Kur nuk ka informacion, çdokujt i lind e drejta të paragjykojë dhe dyshojë për gjëra jo në të mirë të teatrit. Unë e shoh debatin të nxitur nga mungesa e informacionit", tha ish- Presidenti Topi.