“Dhe muret kanë veshë”, mblidhen dëshmitë e viktimave të komunizmit
Kujtesë përmes artit. Jo vetëm një homazh, por edhe mbledhje e dëshmive të të mbijetuarve të diktaturës, historia e së cilës është shkruar në lëkurët e tyre. Autoriteti për Informim për Dosjet e ishSigurimit të Shtetit dhe Fondacioni MAM kanë ndërmarrë një rrugëtim nëpër Shqipëri, në qytete dhe vende ku dikur ngriheshin kampe pune e burgje, për të takuar njerëz e për të fiksuar historitë e tyre. Projekti titullohet “Dhe muret kanë veshë”. Është një projekt ku historia bashkohet me artin bashkëkohor, ideuar nga artistja kosovare Alketa Xhafa Mripa, që aktualisht jeton në Angli. Asaj i bashkohet edhe Kristale Ivezaj Rama, themeluesja e Galerisë me seli në Londër “The Balkan Artists’ Guild”. Siç bën të njohur MAM, kjo vepër bazon kontekstin e saj në formë shumëdimensionale, si një instalacion i memories kolektive nga e kaluara e dhimbshme e disa individëve intelektualë, të cilët humbën lirinë apo jetën e tyre nëpër burgjet e diktaturës komuniste. Artistja do të mbledhë histori në mbarë vendin, duke përzgjedhur kontributet më të mprehta nga secili rajon ku kanë ndodhur këto drama çnjerëzore, për t’u projektuar në një monument ose pikë referimi në disa qytete të Shqipërisë si: Tiranë, Durrës, Shkodër, Vlorë, Gjirokastër, Korçë, Tepelenë, Berat, Elbasan, Burrel etj. Fraza poetike apo thënie që burojnë nga tragjedia njerëzore e shtypjes së çdo forme të lirisë, do të shkëputen nga dorëshkrime, dokumentime apo arkiva personale të personazheve të internuar, që artistja do të hulumtojë nëpër territorin shqiptar. Më pas këto “tekste të ndaluara” do të projektohen në formate të mëdha, në të njëjtën datë ( 09 maj 2018) dhe në të njëjtën kohë nëpër vende specifike të përzgjedhura për këtë projekt. Projekti do të shoqërohet me botimin e një libri, por edhe një dokumentari, i gjithë rrugëtimi i artistes, takimi me njerëz, mbledhja e dëshmive do të dokumentohet, për t’u shfaqur më vonë, jo vetëm për publikun shqiptar, por edhe për atë ndërkombëtar, në një rrjet televizionesh të njohura.