“Presidenti i përbashkët”, SHBA kundër Ramës: Të zhgënjyer
“Gjuha e shkujdesur që aludon për bashkim, është e padobishme dhe dëmton marrëdhëniet e Shqipërisë me vendet fqinje”
Ambasada Amerikane në Tiranë i cilësoi zhgënjyese idetë e Kryeministrit Rama për të pasur një President të përbashkët me Kosovën dhe një politikë të jashtme dhe sigurie të përbashkët.
Përmes një statusi të “Twitter”, ambasada e SHBAve në Tiranë e cilëson këtë deklaratë të padobishme dhe dëmtuese për një fqinjësi të mirë. “Ambasada e SHBA mbeti e zhgënjyer nga deklarata e Kryeministrit Rama mbi Shqipërinë dhe Kosovën me rastin e 10- vjetorit të Pavarësisë së Kosovës. Gjuha e shkujdesur që aludon për bashkim, është e padobishme dhe dëmton marrëdhëniet e Shqipërisë me vendet fqinje. Ne u bëjmë thirrje udhëheqësve që të jenë fqinjë të mirë dhe të lënë mënjanë gjuhën ndarëse të së shkuarës”, shkruhet në një postim në rrjetin social ‘ Twitter’.
Dy ditë më parë, Bashkimi Europian nuk e mirëpriti deklaratën e Kryeministrit Rama, bërë në Prishtinë në Kuvendin e Kosovës. Catherine Ray, zëdhënësja për Politikat e Jashtme dhe Sigurinë në Bashkimin Europian, iu përgjigj interesimit të gazetarëve në Bruksel se këto deklarata mund të interpretohen si ndërhyrje politike në vendet fqinje. “Deklarata që mund të interpretohen si ndërhyrje politike në vendet fqinje nuk ndihmojnë në ndërtimin e marrëdhënieve të mira mes fqinjëve. Bashkimi Europian pret që në të gjithë rajonin të vijojë ndërtimi i marrëdhënieve konstruktive dhe bashkëpunuese mes vendeve, si dhe të intensifiko- het puna me programet përkatëse të reformave, për të avancuar më tej në rrugën e integrimit europian”, deklaroi zëdhënësja. Por një ditë më parë, ishte Kryeministri Rama që sqaroi pozicionin e tij ndaj kësaj deklarate, duke e cilësuar si një projeksion të imagjinatës. “Nëse merret në konsideratë i gjithë konteksti, nuk ka asgjë as për t’u alarmuar, as për t’u çuditur dhe as për të reaguar, a thua se ky ishte një program apo një plan i shpallur, apo thua se kjo do të ndodhë sot, apo do të ndodhë nesër. Kjo mund të mos ndodhë kurrë, por edhe mund të ndodhë. Është thjesht çështje e një imagjinate, që bazohet tek e shkuara, synon të rrokë një nga mundësitë e së ardhmes. Edhe reagimi i Komisionit Europian mund të konsiderohet politikisht korrekt, edhe pse në këndvështrimin tim është i tepërt dhe i panevojshëm”, u shpreh Rama.