Sot, seanca e shumëdebatuar për demarkacionin
Duhen 80 vota, Vetëvendosja e Lista Serbe pritet të jenë kundër
Sot paradite Kuvendi i Kosovës mblidhet për të votuar marrëveshjen e Demarkacionit me Malin e Zi, me pasigurinë nëse do t’i ketë 80 votat që i nevojiten. Lëvizja Vetëvendosja me 32 deputetë ka deklaruar se nuk do ta mbështesë marrëveshjen dhe po ashtu Lista Serbe nuk e voton atë pa u siguruar se do të formohet Asociacioni i Komunave me Shumicë Serbe. Marrëveshja duhet të kalojë për t’i hapur rrugë procesit të liberalizimit të vizave të Kosovës. Aneksi për ndryshim i nënshkruar më parë ndërmjet presidentëve të Prishtinës dhe Podgoricës, Hashim Thaçi dhe Filip Vujanoviç, nuk është mirëpritur nga opozita në Mal të Zi. Ka qenë deputeti malazez, anëtar i partisë “Fronti Demokratik”, Milun Zogoviç, i cili tha se kjo marrëveshje mund ta rrezikojë qasjen e bashkësisë ndërkombëtare karshi Malit të Zi dhe e quajti tradhti planin e pushtetarëve malazezë për t’i dhënë tokën “shtetit të rremë të Kosovës”. Hashim Thaçi dhe homologu i tij, Filip Vujanoviç, kanë nënshkruar një aneks- marrëveshje, në të cilën janë dakorduar që Republika e Kosovës do ta ratifikojë Marrëveshjen për Demarkacionin të arritur në gusht të vitit 2015. Pasi Marrëveshja të ketë hyrë në fuqi, do të formohet një Trup i Përbashkët Punues për shënjimin e vijës kufitare, i cili në mënyrë specifike do të rishikojë dhe korrektojë sektorët në drejtim të Çakorrit dhe Kullës së Zhlepit. Kundërshtim ka pasur edhe anëtari i Komisionit të Demarkacionit, Visar Ymeri, i cili tha se deklarata e përbashkët e Malit të Zi dhe Kosovës që zgjodhi bllokadën me Demarkacionin, u diskutua shumë e nuk u sqarua gjithçka. Aty u tha se jepet mundësia për ta rishikuar kufirin, ndërkohë që nuk u qartësua çfarë mund të ndryshohet. Ymeri tha se ky është një mashtrim me të cilin po mjegullohet situata. “Me këtë marrëveshje vuloset se Kosova nuk humbet territor”, thuhet në deklaratën e re të dy presidentëve. Kjo, sipas Visar Ymerit, tregon se edhe deklarata e njeh marrëveshjen, e cila, sipas tij, është e dëmshme. Më pas për këto arsye ai ka kërkuar që të mos dërgohet nga komisioni për në seancë. Marrëveshja e Demarkacionit është kundërshtuar nga opozita e vitit 2015 në Kosovë, ku bënte pjesë edhe Kryeministri aktual, Ramush Haradinaj, pasi ekspertët e opozitës vlerësuan se Kosova humbiste terren të konsiderueshëm nga kjo marrëveshje.