Udhëzimet për seksionet e posaçme
- Në përbërje të strukturës së Prokurorisë për Krime të Rënda, Prokurorive të Rretheve Gjyqësore, Tiranë, Durrës, Elbasan, Vlorë, Fier, Shkodër, Lezhë, Korçë, Gjirokastër të krijohen seksionet e posaçme te përkohshme me objekt hetimin e veprave penale sipas kompetencës të përcaktuar në kreun 11 të këtij Udhëzimi. - Pranë Prokurorisë së Përgjithshme, caktohet një prokuror/ koordinator ndërmjet Seksioneve të Posaçme dhe Task- Forcës Qendrore Ndërinstitucionale, sipas Marrëveshjes. - Në përbërjen e këtyre Seksioneve, Drejtuesi i Prokurorisë cakton ata prokurorë, të cilët kanë përvojë në hetimin e veprave penale në fushën e krimit të organizuar, krimit ekonomik dhe korrupsionit, krimit në fushën e lëndëve narkotike dhe krimit kundër pastrimit te produkteve të veprës penale ose veprimtarisë kriminale si dhe kalojnë me sukses procesin e verifikimit të integritetit moral dhe profesional nga Prokuroria e Përgjithshme. - Një nga prokurorët e Seksionit caktohet Drejtues i Seksionit. - Drejtuesit e Prokurorive u sigurojnë prokurorëve të këtyre Seksioneve shërbime logjistike dhe mbështetëse të veçanta. Në ato raste, kur numri i çështjeve, sipas kompetencës lëndore të përcaktuar në Marrëveshje është i vogël, drejtuesi i Prokurorisë mund të ngarkojë prokurorët e Seksionit edhe me hetimin e çështjeve të tjera. - Prokurorët e caktuar në këto Seksione bashkëpunojnë me shërbimet e policisë gjyqësore pranë Task - Forcës Speciale Qendrore, Task - Forcës Speciale Rajonale për shkëmbimin e informacionit, për kryerjen e analizave dhe vlerësimeve të përbashkëta rreth grupeve kriminale si dhe realizimin e veprimtarisë hetimore në zbatim të detyrimeve specifike, të përcaktuara në Planin e Veprimit kundër Krimit të Organizuar, Operacioni "Forca e Ligjit". - Drejtuesi i Seksionit, brenda 10 ditëve të para të çdo muaji raporton të dhënat statistikore te prokurori koordinator. - Prokurori koordinator çdo tre muaj, zhvillon takime të përbashkëta me drejtuesit e Seksioneve dhe drejtuesit e Task - Forcave për të diskutuar problematika të organizmit të punës. - Prokurori koordinator, në funksion të përmirësimit të punës së Seksioneve mund të propozojë masa të ndryshme organizative.