SI APLIKOHET NE ATP
Kompensimi, lista II e pronarëve që përfitojnë
Lista e dytë me emrat e 3500 pronarëve që përfitojnë kompensimin për pronat e zëna nga ndërtimet pa leje. ATP: Aplikimet e hapura, ja lehtësirat
Vonesat e krijuara në kompensimin e pronarëve të shpronësuar për efekt të procesit legalizues e kanë origjinën sa në lënien pas dore të këtij procesi nga ana e familjarëve përfitues, aq edhe në mungesën e koordinimit mes institucioneve.
Edhe kësaj radhe, Hipoteka është vendosur në "shënjestër të akuzave" për vonesat që ka sjellë në konfirmimin e statusit të pronës. Janë rreth 3500 pronarë që nga viti 2008 deri në 2017, të cilët gëzojnë të drejtën e kompensimit, por që nuk janë paraqitur asnjëherë në Agjencinë e Trajtimit të Pronave për të aplikuar. Gazeta vijon sot me pjesën e dytë të listës së përfituesve, duke publikuar edhe faturën për çdo familje.
"Gjatë shqyrtimit të aplikimeve të kryera janë hasur problematika jo të pakta, të cilat në shumë raste kanë sjellë dhe zgjatje të panevojshme të procesit. Këto problematika kanë pasur të bëjnë kryesisht me gabime në materiale të evidentuara në VKM- të përkatëse lidhur me gjeneralitetet e subjekteve përfituese, numrat e pasurisë, sipërfaqja e pronës së miratuar për kompensim si dhe vlera e akorduar për shpërblim. Gjithashtu, disa problematika i adresohen dhe korrespondencës dhe konfirmimeve që ATP- ja bën me institucionet e treta", bëhet me dije nga ATP- ja. Për të thjeshtuar dhe lehtësuar sa më shumë procedurat, janë ndërmarrë së fundmi disa ndryshime ligjore. Kështu, kur konstatohen gjeneralitete të ndryshme të subjekteve nga ato faktike të tyre, atëherë ATP- ja ka të drejtë të verifikojë dhe të provojë, bazuar në të dhënat e përgjithshme të pasurisë dhe të trashëgimisë të marra në institucionet e treta, se gjenealitetet e subjekteve përfituese janë të njëjta me ato të subjekteve të publikuara në listat e vendimeve përkatëse të Këshillit të Ministrave. Lehtësira do të ketë edhe në dokumentacion. Nuk do të kërkohet më certifikatë familjare dhe kopje e kartës së identitetit.