Veshjet e “shfaqjet e huaja”, shtyhet kodi për deputetët
Deputetëve u ndalohet të ndjekin modën me tepri
Parlamenti ka shtyre dje votimin e Kodit të Sjelljes së deputetëve, në tentativë për të miratuar me konsensus një draft të pranuar nga të gjitha palët.
Duke qenë se Partia Socialiste dhe Partia Demokratike kanë propozuar një sërë amendamentesh, krerët e grupeve parlamentare kanë rënë dakord që ky votim të bëhet seancën e ardhshme. Kreu i Grupit të PD- së, Edmond Spaho, propozoi që dhe Kodi i Sjelljes të shtyhej në seancën e ardhshme, kërkesë që u mbështet dhe nga grupi i LSI- së. “Duke përshëndetur frymën e mirëkuptimit që rregullat për këtë sallë të bëhen me konsensus të plotë, duke falënderuar ndihmën e dhënë nga OSBE, KiE, besoj se shumë shpejt grupet parlamentare do të arrijnë formulimin e të gjitha neneve, pasi diskutimi për Kodin e Sjelljes quhet i ezauruar”, ka thënë dhe Ruçi.
MODA Por në Kodin e ri të Sjelljes është futur një nen i çuditshëm, që duket si një rikthim pas në kohë, kur jo vetëm nuk lejoheshin, por dënoheshe mirë për “shfaqjet e huaja”. Kodi i Sjelljes së deputetëve që synon të disiplinojë Kuvendin dhe performancën e të zgjedhurve të popullit në Parlament, në nenin 7, përcakton paraqitjen e deputetit në veprimtaritë parlamentare, duke saktësuar disa elementë, të cilët nuk i lejohen në mënyrë kategorike. Duke pasur parasysh se aty është arena e të zgjedhurve që rrahin debat e vendosin për popullin, shumë pika në këtë nen të kodit të ri mund të tingëllojnë qesharake, por praktika ka treguar se nga ajo sallë shpeshherë nuk reflektohet sjellje e admirueshme. Por, duke u ndalur më në detaje, nuk mund të të lërë indiferent, një pikë e nenit 7, ajo që lidhet me modën. “Deputeti nuk duhet të ndjekë modën në mënyrë të tepruar”- thuhet në nenin 7 të Kodit. Se çfarë do të thotë kjo, çfarë është teprimi, e kush e përcakton këtë, kjo sigurisht që lë vend për debat.