Pse po mbyllen bizneset, Tatimet: Skemë për t’i shpëtuar TVSH dhe gjobave
Udhëzimi i Tatimeve: Bizneset me xhiro 2 milionë lekë do të regjistrohen për TVSH- në edhe nëse deklarohen pasiv
Ulja e pragut të TVSH- së për të futur në skemën e deklarimit të TVSH- së bizneset me xhiro mbi 2 milionë lekë ka shtuar numrin e subjekteve të çregjistruara apo që deklarojnë mbyllje aktiviteti.
Drejtoria e Përgjithshme e Tatimeve sqaroi dje se kjo është një skemë që bizneset po përdorin për t’i shpëtuar TVSH- së dhe gjobave. Administrata Tatimore, nëpërmjet një udhëzimi, shpjegon se nëse këto biznese janë evidentuar me xhiro mbi 2 milionë lekë dhe për këtë arsye deklarojnë statusin pasiv, ato do të regjistrohen nga 1 prilli në skemën e TVSH- së. “Drejtoria e Përgjithshme e Tatimeve, ka konstatuar një shtim të numrit të aplikimeve pranë Qendrës Kombëtare të Biznesit për çregjistrim apo pezullim të aktivitetit, nga tatimpagues që janë penalizuar për shkelje të ndryshme nga Administrata Tatimore, që kanë ndryshuar përgjegjësinë tatimore si dhe tatimpagues, të cilët për herë të parë hyjnë në skemën e TVSH- së dhe regjistrime të menjëhershme në po të njëjtën njësi nga persona të lidhur me tatimpaguesit, që e zotëronin më parë këtë aktivitet. Tatimpaguesit e përfshirë në listën e tatimpaguesve për regjistrim në TVSH më 1 Prill, do të regjistrohen për TVSH- në edhe nëse kanë kaluar me status pasiv gjatë periudhës 1 janar - 31 mars 2018”, thuhet në udhëzimin e Tatimeve. Administrata Tatimore pretendon se bizneset e mbyllura janë hapur nga familjarët e subjekteve. Edhe për këto raste, Tatimet udhëzojnë se bizneset do të përfshihen në skemën e TVSH- së dhe nuk do t’u shpëtojnë penaliteteve. “Nëse pas verifikimit në vend, rezulton e provuar se tatimpaguesi që ushtron aktivitet në atë ambient, ka lidhje familjare me tatimpaguesin, i cili ka aplikuar për mbyllje apo pezullim aktiviteti pas ndryshimit të përgjegjësisë tatimore apo konsumimit të kundravajtjes administrative, nga Drejtoria Rajonale Tatimore përkatëse, sipas rastit do t’i komunikohet tatimpaguesit ndërmarrja e hapave administrative të mëposhtëm: Ndryshimi i përgjegjësisë tatimore, duke e ngarkuar atë me të njëjtat përgjegjësi tatimore, që ka pasur tatimpaguesi apo personi i lidhur para aplikimit për mbyllje aktiviteti, pavarësisht xhiros së pritshme të deklaruar nga ana e tij”, thuhet në udhëzimin e Tatimeve.