Humbi tre fëmijët e burrin në aksident, babai: Shteti ta ndihmojë
Nuredin Lika: Vajza ime pësoi traumë që kërkon shërbim të specializuar. Nuk i përballoj dot shpenzimet me një pension
Nuredin Lika, babai i Evisa Prekës, e cila humbi familjen në aksidentin tragjik të Velipojës, kërkon ndihmë nga shteti për rehabilitimin e vajzës së tij.
Prej tri ditësh, Evisa është transferuar nga spitali i Shkodrës në atë të Durrësit, pasi këtu ajo ka familjen dhe të afërmit e saj, të cilët mund t’i qëndrojnë më pranë. Sipas 73- vjecarit, vajza po lufton për jetën dhe është në gjendje shoku, ndaj shteti duhet ta ndihmojë, pasi rasti i saj kërkon rehabilitim dhe duhet të qëndrojë të paktën edhe 20 ditë të tjera në spital. “Kërkuam ta transferonim në Durrës, pasi këtu mund të kujdesemi më shumë dhe më mirë për të. Ne jetojmë në Durrës dhe mund t’i qëndrojmë më pranë vajzës tonë. Siç thashë, ajo kërkon rehabilitim, pasi është në gjendje të rëndë shëndetësore dhe psikologjike. Nuk është pak të humbësh tre fëmijët dhe bashkëshortin. Ndaj, rasti i saj kërkon shërbim të specializuar. I kërkojmë shtetit ta na ndihmojë, pasi kërkohet shërbim i specializuar për rastin e vajzës sime. Ky rast kërkon shpenzime të mëdha dhe unë nuk e përballoj dot si pensionist. Ndaj i drejtohem shtetit të hedh sytë nga ne dhe të na ndihmojë për të kaluar këtë hall të madh”, shprehet babai i të mbijetuarës së aksidentit të Velipojës.
Ai tregon edhe momentin kur vajza e tij mësoi për tragjedinë e rëndë. Askush nuk merrte përsipër t’i tregonte të vërtetën Evisës, ndonëse kjo e fundit nga spitali i Durrësit kërkonte të shikonte fëmijët dhe bashkëshortin. Ka qenë babai i saj, Nuredin Lika, që ka marrë guximin t’i tregojë asaj tragjedinë që kishte ndodhur, ku i shoqi e tre fëmijët nuk ishin më. Ajo ka pësuar një traumë shumë të rëndë dhe tashmë mbahet vetëm me qetësues. “Kam kaluar çastin më të sikletshëm të jetës sime. Zoti më dha kurajë t’i flisja. Mora guximin t’i tregoja të vërtetën, pasi kërkonte në çdo moment të shikonte fëmijët e saj. Ajo u trondit dhe kaloi në gjendje shoku. Evisa, mesa duket mendonte se vajza e madhe do të ishte gjallë... Për pjesën tjetër të familjes nuk kishte shumë shpresa sepse diçka kishte kuptuar që në momentin e aksidentit. Vajza ndiente se diçka e keqe kishte ndodhur. Ajo e pa të shoqin dhe dy fëmijët në tokë pas përplasjes, por shpresonte që vajza e madhe të ishte mirë. Evisa është në gjendje shumë të rëndë shëndetësore dhe psikologjike. Sapo zgjohet kërkon fëmijët, i japin ilaçe… Kërkon të shkojë te varri i fëmijëve. Sa zgjo- het bëhet shumë keq dhe e mbajnë me qetësues”, u shpreh babai i Evisa Prekës, e cila ndodhet nën kujdesin e bluzave të bardha në spitalin e Durrësit. Stafi mjekësor përpiqet t’i qëndrojnë në kokë, por gjendja e saj fizike dhe psikologjike është e rëndë. Sipas stafit të spitalit të Durrësit, edhe pse e dëmtuara ka mësuar për pasojat e aksidentit tragjik, ajo kërkon në mënyrë të pavetëdijshme të shikojë fëmijët dhe bashkëshortin. Aksidenti tragjik ndodhi pasditen e 19 shkurtit në aksin Shkodër- Velipojë, ku dy makina u përplasën me njëra – tjetrën. Nga aksidenti tragjik humbi jetën kryefamiljari’ që ishte edhe drejtuesi i mjetit, Edmond Preka, vajza e tij 5- vjeçare dhe djali tetë muajsh. Ndërsa mbetën të plagosur rëndë bashkëshortja Evisa Preka dhe vajza e madhe, Noemi. Kjo e fundit nuk mundi t’u mbijetonte plagëve dhe ndërroi jetë tri ditë më vonë në spitalin e Shkodrës.