Zbulohen emrat e grupit negociator për paktin detar

Emrat nga Ministria e Jashtme, Mbrojtja, Drejtësia, Policia, AKBN dhe tre institute

Presidenti i Republikës, Ilir Meta, ka marrë nga ministri i Jashtëm, Ditmir Bushati, emrat e grupit negociator dhe kryesuesit e tij.

Ministria për Europën dhe Punët e Jashtme konfirmoi dje se u është përgjigjur të gjitha kërkesave të Presidentit të Republikës në lidhje me autorizimin për plotfuqishmërinë e grupit negociator për marrëveshjen me Greqinë. Në krye të grupit negociator, për të cilët Presidenti i Republikës kishte kërkuar emrat, janë një përfaqësues i Ministrisë së Jashtme dhe një nga Ministria e Mbrojtjes. Armand Skapi, nga Drejtoria e Traktateve në Ministrinë për Europën dhe Punët e Jashtme dhe Major Ylber Dogjani, Gjeneral, Komandant i Flotës Detare, do të drejtojnë grupin negociator të përbërë nga 12 anëtarë. Në grupin e ekspertëve bën pjesë dhe Arsen Mullai, Shef Shtabi i Forcës Detare, por dhe Viktor Doda, Drejtor i Përgjithshëm i Shërbimit Gjeologjik Shqiptar. Nga Ministria e Brendshme, grupi negociator ka Aida Hajna, zv/ drejtoreshë e Policisë së Shtetit, ndërsa nga burimet natyrore, Ardjan Bylykun, drejtori i AKBN- së. Edhe Ministria e Drejtësisë do të përfaqësohet në grupin negociator me Elira Kokonën, sekretare e përgjithshme e Ministrisë së Drejtësisë. Por dhe institutet nuk janë lënë jashtë. Ferdi Hyraj nga Instituti i Gjeografisë, Luan Përzhita, Instituti i Arkeologjisë dhe Lorenc Çela, Drejtor i Institutit të Gjeohapësirës janë tre anëtarë të grupit negociator. Pjesë e këtij grupi është dhe Qirjako Qirko, ambasador në Londër, ish- sekretar i Përgjithshëm i Ministrisë së Jashtme. Qirko është në këtë grup, sepse nën detyrën e Sekretarit të Përgjithshëm të Ministrisë së Jashtme që në 2013, ka qenë personi i kontaktit që është marrë me Ministrinë e Jashtme greke për të përcaktuar parimet e bisedimeve politike për një marrëveshje të re mes palëve. Gru- pi pret të marrë plotfuqinë negociatore menjëherë pasi Presidenti i Republikës, Ilir Meta, do t’i japë ministrit të Jashtëm, Ditmir Bushati, autorizimin e tij.

PRESIDENTI

Presidenti i Republikës, Ilir Meta, përmes një letre i kërkoi ministrit të Jashtëm më shumë sqarime dhe saktësime në kërkesën e tij për marrjen e autorizimit për plotfuqishmërinë e grupit negociator. Sipas kreut të shtetit, kërkesa për Autorizim duhej të ishte e shprehur ekzaktësisht mbi titullin e marrëveshjes dhe objektin e saj. Në kërkesën për Autorizim për Negocim, do të duhej të përfshiheshin edhe hartat analoge dixhitale, si instrumente negociuese teknike parësore, që pasqyrojnë realitetin gjeografik të hapësirës që delimitohet. Presidenti i Republikës shprehej se kërkesa për autorizim duhej shoqëruar detyrimisht me listën nominale të emrave konkret të përbërjes së grupit negociator, shoqëruar me CV përkatëse, që do të krijonte mundësinë e vlerësimit të përmbushjes së kritereve të integritetit moral dhe profesional, që krijojnë besimin te Presidenti i Republikës, për t’i dhënë besimin që ta përfaqësojnë atë në këto negociata.