Amnistia e kredive nga shteti, familjet që përfitojnë
Shtohen kategoritë që përfitojnë nga ligji i ri i strehimit. Familjet që do t’u falet kredia e dhënë nga shteti dhe ata që marrin legalizim pa pagesë
Qeveria do të legalizojë falas të gjitha banesat e personave të shpërngulur për shkak të ndërtimit të veprave publike, si hidrocentrali i Banjës apo i Fierzës.
Për banesat që figurojnë ende të paprivatizura, Këshilli i Ministrave ka vendosur që t’ia kalojë ato familjeve pa asnjë pagesë. Ky vendim do të rregullohet me miratimin e projektligjit për “Strehimin social”, i cili prej disa muajsh po diskutohet në komisionet parlamentare. Në nismën e qeverisë thuhet se njësia bashkiake pasi të evidentojë familjet që janë zhvendosur nga zonat ku janë ndërtuar vepra publike, do të marrë vendim që ato t’i kalojnë zotëruesit pa asnjë detyrim financiar. “Banesat e ndërtuara për familjet e shpërngulura për shkak të ndërtimit të veprave publike, të tilla si hidrocentrali i Banjës, hidrocentrali i Fierzës, të cilat ende figurojnë të paprivatizuara, privatizohen falas, me vendim të këshillit të njësisë së vetëqeverisjes vendore përkatëse dhe sipas listës emërore që kanë trashëguar”, thotë projektligji për “Strehimin social”. Ndërkohë që familjet e tjera, që janë shpërngulur nga zonat që janë prekur nga ndërtimet publike, qeveria ka marrë përsipër që t’ua falë kreditë që kanë marrë nga Enti i Banesave. “Familjeve të shpërngu- lura për shkak të ndërtimit të veprave publike dhe kategorive të tjera në pamundësi financiare, të cilat kanë përfituar kredi nëpërmjet Entit Kombëtar të Banesave, u falen detyrimet monetare, sipas përcaktimeve në vendimin e Këshillit të Ministrave”, thek- son projektligji në dispozitat e posaçme të saj. Tjetër kategori përfituese do të jenë dhe familjet që janë prekur nga Ujëmbledhësi i Bovillës. Për këta të fundit, qeveria ka parashikuar që t’u japë hipotekën pa pagesë si dhe t’ua legalizojë ndërtesat që ata kanë kryer pa leje në një zonë tjetër. “Për objektet e ndërtuara për familjet e shpërngulura nga ndërtimi i Ujëmbledhësit të Bovillës, kalimi i së drejtës së pronësisë mbi objektin dhe truallin realizohet pa pagesë nga Agjencia e Legalizimit, Urbanizimit dhe Integrimit të Zonave/ Ndërtimeve Informale. Këshilli i Ministrave përcakton me vendim procedurat dhe afatet që ndiqen nga ALUIZNI për kalimin e së drejtës së pronësisë”, thuhet në parashikimin ligjor.
FAMILJA E KREDIVE
Në relacionin e projektligjit theksohet se përfituesit e faljes së kredive nga Enti Ko- mbëtar i Banesave janë kryesisht në qytetet e Lezhës, Tiranës dhe Durrësit. Në total bëhet fjalë për 1084 familje, që do të përfitojnë nga ky proces. Ndërsa në gjashtë qytete të tjera të vendit do të përfitojnë familjet që janë prekur nga përmbytjet. Sipas të dhënave të qeverisë, në Shkodër janë 177 familje që kanë marrë kredi nga Enti Banesave, por që janë dëmtuar për shkak të përmbytjeve. Qyteti tjetër që është prekur më shumë nga përmbytjet është Lezha, që sipas projektligjit, do të falen 94 familje nga kreditë. Qytetet e tjera përfituese janë: Elbasani, Hasi, Fieri dhe Tirana.