Ambasadori i SHBA: Drejtues të votuar kanë shitur vajza, të arrestohen
Donald Lu: Ndiej neveri për disa prej drejtuesve të këtij vendi. Duhet të arrestohen dhe të dënohen me të gjithë fuqinë e ligjit
Ambasadori amerikan, Donald Lu ka kërkuar arrestimin dhe dënimin maksimal për të gjithë trafikantët e qenieve njerëzore, përfshirë edhe disa drejtues të votuar në vend, që kanë shitur vajza në skllavëri.
Gjatë konferencës kundër trafikimit të qenieve njerëzore, Lu deklaroi se Shqipëria ka nevojë që qeveria të angazhohet më shumë politikisht dhe të dorëzojë pa vonesa fondet për viktimat e trafikimit. Ai tha se ndien neveri që disa drejtues të votuar në vendin tonë kanë trafikuar vajza të pafajshme në Europë. “Ndiej neveri që disa prej drejtuesve të votuar të këtij vendi, ma merr mendja edhe nga vende të tjera nga rajoni, kanë qenë burrat që i shitën këto vajza të pafajshme në skllavëri. Ata duhet të arrestohen dhe të dënohen me të gjithë fuqinë e ligjit”, u shpreh Donald Lu. Kryediplomati amerikan i ka kërkuar qeverisë të dorëzojë me urgjencë fondet për gratë dhe fëmijët që bien viktima të trafikimit. Departamenti Amerikan i Shtetit i kushton një rëndësi të veçantë bashkëpunimit rajonal, sa i takon luftës kundër trafikimit të personave. Sipas ambasadorit Lu, Shqipëria në këtë luftë ka treguar udhëheqje rajonale. I ftuar në konferencën antitrafik, Lu kërkoi përmirësim të ofrimit të shërbimeve dhe vetëdijes për të luftuar trafikimin e personave në Ballkan.
AMBASADORI Donald Lu i bëri një thirrje qeverisë që fondet e strehëzave të grave të përfundojnë pikërisht në ndihmë të vajzave dhe grave që janë viktima të trafikut. “E përgëzojmë Shqipërinë që ka treguar udhëheqje rajonale, përfshirë mikpritjen e një konference për 10 koordinatorë të antitrafikut 2 vjet më parë, për të diskutuar parandalimin e trafikimit të fëmijëve. Trafikimi i qenieve njerëzore nuk është një çështje që mund të zgjidhet pa bashkëpunim intensiv rajonal. Departamenti Amerikan i Shtetit e kupton këtë dhe ka dhënë një grant bujar për qeveritë dhe organizatat jofitimprurëse për të krijuar një rrjet rajonal bashkëpunimi. Jemi veçanërisht entuziastë për punën inovatore të këtij projekti në përpjekjet e riintegrimit të viktimave sepse qëllimi afatgjatë nuk është vetëm vendosja e viktimave në strehëza, por që ato të dalin prej tyre me aftësi, siguri financiare dhe vetëbesim. Ky projekt do të ndihmojë për këtë”, u shpreh Lu. Në fund, ai u bëri thirrje qeverive të rajonit, por veçanërisht asaj shqiptare, që të vazhdojnë të japin fonde për strehëzat e këtyre grave dhe fëmijëve të trafikuar. “Në rastin e Shqipërisë, këtu ka nevojë jo vetëm që të an- gazhohen politikisht në këtë situatë, por që edhe t’i dorëzojnë me të vërtetë fondet e caktuara pa vonesa. I urojmë fat në zbatimin e këtij projekti të rëndësishëm, ju e keni mbështetjen tonë”, deklaroi ambasadori Donald Lu. Në konferencë marrin pjesë zv. ministrja e Brendshme, Rovena Voda, si dhe koordinatorët Antitrafik të Maqedonisë, Malit të Zi dhe Kosovës.