“Imuniteti politik për Tahirin, do ketë pasoja për vendin”
“Rama e ktheu Parlamentin në gjykatë politike për të penguar arrestimin e Tahirit, mbron pushtetin”
Partia Demokratike e akuzon ish- ministrin e Brendshëm, Saimir Tahiri, se në bashkëpunim me disa drejtorë të Policisë në rrethe, ka qenë pjesë e një grupi të strukturuar kriminal.
Nënkryetari i Grupit Parlamentar të PD- së, Enkelejd Alibeaj, iu referua përgjimeve të autoriteteve italiane kur e akuzoi deputetin Tahiri për lidhje në biznesin kriminal të trafikut të lëndëve narkotike me vëllezërit Habilaj dhe drejtorin e Policisë së Vlorës, Jaeld Çela. “Nga përgjimet e autoriteteve italiane, provohet se Saimir Tahiri, ministër i Brendshëm, Jaeld Çela, drejtor i Policisë së Vlorës, i emëruar nga Tahiri, Florian dhe Moisi Habilaj, trafikantë droge që përdornin makinën e Tahirit, Gentian Çeka, shofer personal i Tahirit dhe Orest Sota, mik i Tahirit që iu gjetën 863 mije euro me patentat e Tahirit, janë një grup i strukturuar kriminal, secili me rolin e vet, me qëllimin e përbashkët, trafikimin e kanabisit drejt Italisë”, tha Alibeaj. Sipas deputetit demokrat, ishin pikërisht këto prova që lidhnin Tahirin me kanabizimin e vendit dhe kriminalizimin e Policisë, që nxitën Kryeministrin Rama ta kthente Kuvendin në gjykatë politike, për t’i ofruar mbrojtje ish- ministrit të tij. “Këto prova, që përbëjnë bazën e vendimit të Gjykatës së Krimeve të Rënda për të arrestuar drejtuesit më të lartë të Policisë së Vlorës, janë bërë të pavlefshme për arrestimin e Saimir Tahirit, sepse ish- ministri i Brendshëm ka mbrojtjen politike të Kryeministrit të vendit. Këto prova të implikimit të Tahirit në trafikun e drogës dhe shumë të tjera, për të cilat Edi Rama është në dijeni, janë arsyeja pse Kryeministri e ktheu Parlamentin në një gjykatë politike, duke mos lejuar drejtësinë të bëjë detyrën. Me vendimin për të mbrojtur Saimir Tahirin dhe për të mbyllur hetimet ndaj tij, Edi Rama nuk mbron thjesht ish- ministrin e tij të Brendshëm, por mbron pushtetin e tij, që i ka rrënjët te kanabizimi i vendit nëpërmjet kriminalizimit të Policisë, i vetmi projekt i suksesshëm i Kryeministrit Rama”, theksoi deputeti i PD- së. PASOJAT Demokratët janë të bindur se kjo mbrojtje politike që Rama i ka dhënë ish- ministrit të Brendshëm, do të ketë kosto për vendin, kur pritet një përgjigje për hapjen e negociatave për Shqipërinë në BE. “Kostoja e imunitetit politik për Saimir Tahirin mund të rezultojë shumë e lartë për shqiptarët, përderisa vendet anëtare të Bashkimit Europian kërkojnë Saimir Tahirin para drejtësisë, që Shqipërisë t’i hapen negociatat e anëtarësimit”, deklaroi Alibeaj. Partia Demokratike publikoi disa ditë më parë dosjen e përgjimeve për Jaeld Çelën, drejtorin e Policisë së Vlorës, i cili, në bazë të përgjimeve të autoriteteve të drejtësisë italiane, komunikon- te me vëllezërit Habilaj për të sinjalizuar mbi kontrollet e Policisë dhe mundësinë e trafikimit të lëndëve narkotike jashtë vendit. Për çështjen “Tahiri”, Kuvendi ka ngritur edhe një komision hetimor me kërkesë të PD- së, ku do të merret edhe dëshmia e ish- ministrit të Brendshëm.